नेपाल पूर्वाधार 
काठमाडौं । पृथ्वी राजमार्गको नौबिसे मुग्लिन सडक पुन अवरुद्ध भएको छ । नौविसे मुग्लिन खण्डको घोप्टेभिरमा पहिरो गएपछि सडक अवरुद्ध भएको सडक डिभिजन भरतपुरकी इञ्जिनियर आशिका पोखरेलले जानकारी दिइन् । पहिरो गएको स्थान नौविसेदेखि ८० किलोमिटरको दूरीमा पर्छ ।
पहिरो गएको ठाँउमा सडक खुलाउनको लागि दुई वटा मेसिन पठाइएको छ । त्यसमध्ये एउटा सडक विभाग र अर्को स्थानीय तहको हो । इञ्जिनियर पोखरेलका अनुसार चाडै एकतर्फी सडक खुल्नेछ । पहिरोको कारण सडकको १ सय मिटर लम्बाइसम्म पूरै डेब्रिज थुप्रिएको छ । पहिरो गएपछि सडक जाम भएको छ ।
यसअघि नाग्दी खोलाको पुलमा गएको पहिरोको कारण नौविसे मुग्लिन सडक बुधबार रातिदेखि अवरुद्ध भएको थियो । त्यस ठाउँमा केही घण्टाअघि मात्र सडकमा थुप्रिएको डेब्रिज हटाएर सवारी सुचारु गरिएको थियो ।
