नेपाल पूर्वाधार 
फाइल तस्वीर
काठमाडौ । आगामी असारको दोस्रो साता नेपाल र बंगलादेशबीच ऊर्जा सहकार्यका लागि गठित सचिवस्तरीय संयुक्त सञ्चालन समिति (जेएससी) को बैठक बस्ने भएको छ ।
दुई देशबीच विद्युत व्यापार र जलविद्युत आयोजनाको सहकार्यका लागि गठित समितिको बैठक आगामी जुन २६ र २७ अर्थात १२ र १३ गते बस्न लागेको हो । सन् २०१८ मा दुई देशबीच ऊर्जामा सहकार्यको सम्झौता भएपछिको यो चौथौ बेठक हो ।
ऊर्जा, जलस्रोत तथा सिञ्चाई मन्त्रालयका अनुसार, असार १२ गते सहसचिवस्तरीय संयुक्त कार्यकारिणी समिति (जेडब्लूसी) र असार १३ गते सचिवस्तरीय जेएससीको बेठक बस्नेछ ।
यसअघि भदौमा भएको बैठकमा नेपालले बंगलादेशलाई ६८३ मेगावाटको सुनकोशी तेस्रो जलविद्युत आयोजना निर्माणका लागि प्रस्ताव गरिसकेको छ । सोबारे पनि बैठकमा छलफल गर्ने कार्यक्रम छ ।
यसैगरी बैठकमा दुई देशबीच विद्युत व्यापारबारे छलफल हुनेछ । गत भदौकै बेठकले नेपालबाट बंगलादेशमा विद्युत व्यापार गर्ने आवश्यक तयारीका लागि नेपाल विद्युत प्राधिकरण र बंगलादेश पावर डेभलपमेन्ट बोर्डलाई जिम्मेवारी तोकेको छ ।
बैठकमा नवीकरणीय ऊर्जा प्रवद्र्धन, ऊर्जा दक्षता लगायतबारे पनि छलफल हुनेछ ।
