
काठमाडौं । नेपाली कांग्रेसको १५औं महाधिवेशनअन्तर्गत नयाँ केन्द्रीय कार्यसमितिको निर्वाचनका लागि उम्मेदवारी मनोनयन दर्ताको समय साँझ ६ बजेसम्म थप गरिएको छ।
कांग्रेस केन्द्रीय निर्वाचन समितिले यसअघि आज दिउँसो ४ बजेसम्म उम्मेदवारी दर्ताको समय तोकेको थियो। उम्मेदवार तथा प्रतिनिधिहरूको चापलाई ध्यानमा राख्दै समय थप गरिएको हो।
यसैबीच नयाँ कार्यसमितिका पदाधिकारीतर्फ उम्मेदवारी दर्ता भइरहेको छ। हालसम्म उपसभापति, महामन्त्री र सहमहामन्त्री पदमा १३ जनाले उम्मेदवारी दर्ता गराएका छन्।
हालसम्म उम्मेदवारी दर्ता गर्नेहरूमा उपसभापतितर्फ पुष्पा भुसालले महिला र विनोद चौधरी तथा फरमुल्लाह मन्सुरले समावेशी समूहबाट उम्मेदवारी दिएका छन्।
महामन्त्रीतर्फ डिला संग्रौला र रिता खनालले महिला तथा शंकर तिवारी, सुनिल शर्मा र नैनसिंह महरले खुलातर्फ उम्मेदवारी दर्ता गराएका छन्।
यस्तै सहमहामन्त्रीतर्फ प्रतिमा गौतमले महिला, देवेन्द्रराज कंडेल र रामहरि खतिवडाले खुला, मनोजमणि आचार्यले खस आर्य तथा जीवनबहादुर शाहीले पिछडिएको क्षेत्रबाट उम्मेदवारी दर्ता गराएका छन्।
उम्मेदवारी दर्ताको समय सकिएपछि निर्वाचन समितिले प्रक्रिया अघि बढाउने जनाएको छ।

