नेपाल पूर्वाधार 
काठमाडौं। त्रिभुवन विश्वविद्यालयले अध्ययन बिदा लिएपछि विश्वविद्यालयको नियमानुसार सेवामा नफर्किएका तथा तोकिएको सेवा अवधि पूरा नगरेका शिक्षक तथा कर्मचारीबाट हालसम्म करिब १६ करोड ५० लाख रुपैयाँ असुलउपर गरेको छ ।
त्रिवि रजिष्ट्रारको कार्यालयअन्तर्गत कर्मचारी प्रशासन महाशाखाका अनुसार हालसम्म ७५ ओटा केसबाट उक्त रकम असुल गरिएको हो ।
अध्ययन बिदापछि सेवामा नफर्किएका वा फर्किएर पनि तोकिएको सेवा अवधि पूरा नगरेका शिक्षक तथा कर्मचारीबाट विश्वविद्यालयले रकम असुलउपर गर्ने प्रक्रिया अघि बढाएको छ । अध्ययन बिदाका क्रममा विश्वविद्यालयबाट प्राप्त तलब, भत्ता तथा अन्य सुविधामा नियमानुसार हर्जाना समेत जोडेर रकम असुल गर्ने व्यवस्था रहेको त्रिविले जनाएको छ ।
विश्वविद्यालयका अनुसार थप केसहरूको हिसाब-किताब तयार गर्ने तथा सम्बन्धित अभिलेख खोजी गर्ने काम भइरहेको छ । हालसम्म हिसाब-किताब तयार भएका केसमा करिब २१ करोड ५० लाख रुपैयाँ असुल गर्नुपर्ने रकम रहेको विवरण त्रिविले जनाएको छ ।
सम्पर्कमा आएका शिक्षक तथा कर्मचारीका व्यक्तिगत अभिलेख खोजी तथा अध्ययन गर्ने कामसमेत भइरहेको विश्वविद्यालयले जनाएको छ । त्यस्ता व्यक्तिबाट विश्वविद्यालयलाई बुझाउनुपर्ने रकम असुलउपर गर्ने प्रक्रिया जारी रहेको त्रिविको भनाइ छ ।
त्रिविले अध्ययन बिदा उपभोग गरेपछि नियमअनुसार सेवामा नफर्किएका वा तोकिएको सेवा अवधि पूरा नगरेका शिक्षक तथा कर्मचारीलाई २०८३ साल पुस मसान्तभित्र रजिष्ट्रारको कार्यालयमा सम्पर्क गर्न आग्रह गरेको छ । उनीहरूले studyleave@tu.edu.np मार्फत समेत सम्पर्क गर्न सक्ने विश्वविद्यालयले जनाएको छ ।
तोकिएको अवधिभित्र सम्पर्क नगरेमा विश्वविद्यालयसँग गरिएको कबुलियतनामा तथा प्रचलित विश्वविद्यालय नियमअनुसार कानुनी कारबाही अघि बढाइने त्रिविले स्पष्ट पारेको छ ।
