नेपाल पूर्वाधार 
तनहुँ । तनहुँ जिल्लामा रहेका खेतीयोग्य जमिनमा बाह्रैमहिना सिँचाइ सुविधा पुर्याउने लक्ष्यका साथ सिँचाइ क्षेत्रमा काम भइरहेको छ । कूल ६५ हजार हेक्टर खेतीयोग्य जमिनमध्ये ५१ हजार ६ सय १४ हेक्टर जमिनमा खेती बाली हुँदै आएकोमा सिँचाइ सुविधा बढाएर खेती योग्य भूमि बढाउन लागिएको हो ।
विभिन्न सिँचाइ आयोजना सम्पन्न गरी जिल्लामा हाल ५ हजार ७ सय ७२ हेक्टर क्षेत्रफल जमिनमा बाह्रैमहिना सिँचाइ सुविधा पुर्याइएको जिल्लास्थित सिँचाइ विकास डिभिजन कार्यालयले जनाएको छ ।
खेतीयोग्य रहेका ६५ हजार बढी हेक्टर जमिनमा सिँचाइ सुविधा पुर्याउने लक्ष्यका साथ का भइरहेको कार्यालयका इन्जिनियर एवं सूचना अधिकारी जगन्नाथ चापागाईंले जानकारी दिए । उनका अनुसार गण्डकी प्रदेश र संघीय सरकारबाट विनियोजित बजेटबाट गत वर्ष एक सय ४३ मध्ये ८६ आयोजना निर्माण सम्पन्न भएका छन् ।
स्रोत सुनिश्चितता भई ठेक्का प्रक्रियाबाट काम भइरहेका योजनाका लागि कम बजेट विनियोजन हुँदा निर्माण प्रभावित हुने गरेको चापागाईंले बताए । “भौगोलिक विकटताका कारण अधिकांश स्थानमा पानीको स्रोत नहुँदा सिँचाइ योजना महँगो हुने गरेको छ”, उनले भने, “अधिकांश पाखोबारी बाँझो रहेकाले सिँचाइको पहुँच पुर्याइ स्थानीयवासीको जीवनस्तर माथि उकास्ने लक्ष्य रहेको छ ।”
चापागाईंका अनुसार ठेक्का लागे पनि बजेट विनियोजन नहुँदा जिल्लाका चार योजना अलपत्र बनेको छ । व्यास–५ को साँघे पतेनी, बन्दीपुर–३ कोलपाटा लिफ्ट सिँचाइ योजना, ऋषिङ–५ को अठारबिसे र व्यास–५ को याम्दी खोला चापटार लिफ्ट सिँचाइ योजना रहेका उनले बताए । “गत वर्ष बजेट विनियोजन भए पनि चालु आवमा बजेट विनियोजन नहुँदा निर्माण प्रभावित भएको छ,” उनले भने ।
कार्यालयका अनुसार मुख्य योजनाका रुपमा दुई परियोजना रहेका छन् । व्यास–१० को नारेश्वर ताल जलाशय योजनाका लागि १ करोड ९४ लाख रुपैयाँमा ठेक्का सम्झौता भएको थियो । साथै शुक्लागण्डकी–९ मा पहाड खोला बस्ती संरक्षण कार्यका लागि पनि १ करोड ८९ लाख रुपैयाँ बजेट विनियोजन भएको छ ।
