नेपाल पूर्वाधार 
जाजरकोट । तीन आर्थिक वर्षमा कर्णाली प्रदेश भौतिक पूर्वाधार तथा सहरी विकास मन्त्रालयले करिब ७९ किलोमिटर सडक कालोपत्र गरेको छ । दस जिल्लाको सडक कालोपत्रसम्बन्धी समीक्षा कार्यक्रममा ७८ किलोमिटर ९५ मिटर सडक कालोपत्र भएको मन्त्रालयले जनाएको हो ।
आव २०७७/७८ मा ३३.०२ किलोमिटर, २०७८/७९ मा १५.९० किलोमिटर सडक कालोपत्र भएको भएको मन्त्रालयका सूचना अधिकारी रमेश सुवेदीले बताए । सुवेदीका अनुसार आव २०७९/८० मा ३०.०३ सडक कालोपत्र भएको छ । त्यस्तै दस जिल्लामा ४३.०१ किलोमिटर सडक ग्राभेल गरिएको बताइएको छ ।
सडकको स्तरोन्नति र नाला निर्माणको कामसमेत भएको छ । आव २०७७/७८ मा ४५.६५ किलोमिटर, आर्थिक वर्ष २०७८/७९ मा ४१.३८ किलोमिटर र आव २०७९/८० मा १२९.२५ गरी जम्मा २१६.२८ किलोमिटर सडकको स्तरोन्नति र नाला निर्माण भएको बताइएको छ । उक्त तीन आर्थिक वर्षमा मन्त्रालयले दस जिल्लामा ५५ वटा झोलुङ्गे पुल र २२ वटा पक्की पुल बनाएको छ ।
