नेपाल पूर्वाधार 
काठमाडौं । नेपाल भू–प्रविधि समाजको २९ औं वार्षिक उत्सव विविध कार्यक्रम गरी मनाइएको छ । दीगो विकासको लागि भूप्रविधि नाराको साथ मनाइएको वार्षिकोत्सवमा समाजले एक विशेष कार्यक्रमकाबीच विविध ५ विधामा योगदान पुर्याउने व्यक्तित्वहरुलाई सम्मान गर्यो ।
समाजले प्राध्यापक डा. मदन बहादुर कार्कीलाई लाइफटाइम अचिभमेण्ट अवार्डमार्फत सम्मान गरेको छ । उनले इञ्जिनियरिङ अध्ययन संस्थान, पुल्चोकमा भूप्रविधि विषयमा लामो समय अध्यापन गरेका छन् । त्यस्तै, जापान तथा अमेरिका पुगेर अनुसन्धान तथा परामर्श कार्यमा पुर्याएको योगदानको सम्मान गर्दै उनलाई यो अवार्डले प्रदान गरिएको समाजका उपाध्यक्ष डा.मन्दिप सुवेदीले जानकारी दिए ।
समाजले ‘जिओलोजीकल कन्ट्रिब्युसन अवार्ड’ भने इञ्जिनियर इन्दु शर्मा ढकाललाई प्रदान गरेको छ । ढकाल भौतिक पूर्वाधार तथा यातायात मन्त्रालयका पूर्व सहसचिव हुन् । उनले सडक विभागमा ३३ वर्ष काम गरेका थिए । अहिले एशियाली विकास बैंकमा कार्यरत छन् ।
त्यस्तै, नेशनल जिओटेक्नीकल प्राइड अवार्डबाट इञ्जिनियर तथा सडक विभागका उपमहानिर्देशक नरेशमान शाक्य सम्मानित भएका छन् । पछिल्ला ३१ वर्षदेखि सडक विभागमा सक्रिय शाक्य नागढुंगा सुरुङमार्ग योजनाको प्रमुखको रुपमा काम गरिसकेका छन् । उनले राष्ट्रिय र अन्तराष्ट्रिय रुपमा पनि धेरै अनुसन्धान पत्रहरु प्रकाशित गरेका छन् ।
इञ्जिनियर किशोर पौडेललाई इञ्जिनियरिङ आट्रप्रेनर अवार्डबाट सम्मान गरिएको छ । उनी १ हजारभन्दा बढी राजमार्ग, रेलवे, भवन निर्माणमा सहभागी भइसकेका छन् । उनले भूप्रविधि ल्याब उद्योगको प्रवद्धनमा खेलेको भुमिकाको लागि यो सम्मान प्रदान गरिएको हो ।
‘एक्सिलेण्ट ग्राजुएट थेसिस अवार्ड’ बाट इञ्जिनियर राजन केसी सम्मानित भएका छन् । पुल्चोक इञ्जिनियरिङ कलेजका विद्यार्थी केसीको मास्टर्स थेसिसले सबैभन्दा धेरै अंक प्राप्त गरेको थियो ।
