नेपाल पूर्वाधार 
तुलसीपुर । याे वर्ष गत असार,साउन र भदौ महिनामा राप्ती तथा बबई नदीमा आएकाे बाढीले १३.७ किलाेमिटर तटबन्धमा क्षति पुगेकाे अध्ययनले देखाएकाे छ । जनताको तटबन्धन लमही कार्यालयले गरेकाे अध्ययन गरी संकलन गरेकाे विवरण अनुसार बर्खामा राप्ती र बबई नदीमा आएकाे बाढीले यति तटबन्धमा क्षति पुगेकाे देखाएका हाे ।
अध्ययनका क्रममा यी दुईवटै ठूला नदीले गत बर्खामा कटान गरेको स्थानमा तटबन्धन नगरे अर्को वर्ष अझै ठूलो क्षति पुग्ने अवस्था देखिएकाे कार्यालयका सिनियर डिभिजनल इञ्जिनियर रमानन्द दासले बताए । “हामीले गएको वर्षातले तटबन्धनमा गरेको क्षतिको विवरण संकलन गरेका छौं”, उनले भने, “बर्खाकाे बाढीले १३.७ किलोमिटर क्षेत्रफलमा क्षति भएको छ । यदि त्यो क्षेत्रमा यो वर्ष नै तटबन्ध नगरे अर्को वर्ष बाढीले थप क्षति गर्नेछ।”
क्षति भएको तटबन्ध क्षेत्रको विवरण विभागमार्फत ऊर्जा, जलस्रोत तथा सिँचाइ मन्त्रालयमा पठाइसकेको पनि उनले बताए। अहिले तटबन्धनका लागि उल्लेख्य बजेट नभएकाले मन्त्रालयमा माग गरिएको उनले बताए ।
त्यो क्षेत्रमा तटबन्धन निर्माण गर्न करिब एक अर्ब रुपैयाँ बजेट आवश्यक पर्ने अनुमान गरिएको छ । सहायक नदीहरूमा पनि विभिन्न स्थानमा क्षति भएको दासले बताए । उनका अनुसार राप्ती नदीले दाङको राप्ती, गढवा राजपुर गाउँपालिका, लमही नगरपालिकासहित बाँकेको नरैनापुर, राप्ती सोनारीलगायतका गाउँपालिकामा क्षति पुर्याएकाे छ ।
बबई नदीले तुलसीपुर उपमहानगरपालिकाको वडा नं ११, १२, १३ र १४ सहित दङ्गीशरण, शान्तिनगर, बबई गाउँपालिकामा क्षति पुर्याएको छ । जनताको तटबन्धन कार्यालयले राप्ती र बबई नदीमा तटबन्धन निर्माणकाे काम गर्दै आएकाे छ ।
