Nepal Purbadhar

शुक्रबार, मंसिर २३, २०७९
Friday, December 9, 2022

शुक्रबार, मंसिर २३, २०७९
Friday, December 9, 2022

बाँके ब्लक-१ र ब्लक-२ को सौर्य विद्युत प्रवाहका लागि साढे १५ किलोमिटर प्रसारण लाइन निर्माण हुँदै


काठमाडौं । बाँकेको खजुरा–८ मा निर्माणाधीन २० मेगावाटको बाँके सौर्य विद्युत आयोजनाको विद्युत प्रवाह गर्न साढे १५ किलोमिटर प्रसारण लाइन निर्माण गरिने भएको छ । गोल्यान समूहले निर्माण गरिरहेको बाँके ब्लक–१ (१० मेगावाट) र बाँके ब्लक–२ (१० मेगावाट) को विद्युत प्रवाह गरी कोहलपुर सबस्टेसनसम्म पुर्याउन ३३ केभी डबल सर्किट प्रसारण लाइन निर्माण गरिने भएको हो ।

विद्युत विकास विभागले प्रसारण लाइन आयोजनाको अनुमतिपत्र दिने प्रक्रिया अघि बढाएको छ । विभागले बुधबार सार्वजनिक सूचना जारी गरी प्रसारण लाइन निर्माण तथा सञ्चालन गर्दा कुनै प्रकारको प्रतिकुल प्रभाव पर्ने भएमा अबको ३५ दिनभित्र लिखित राय/सुझाव पेश गर्न सम्बन्धित सरोकारवालाहरू समक्ष आग्रह गरेको छ ।

प्रसारण लाइन निर्माणको अनुमतिका लागि आयोजनाको प्रवद्र्धक पियोर इनर्जी कम्पनीले आवेदन दिएको हुँदा विभागले त्यसको कार्यान्वयन गर्न सरोकारवालाको राय/सुझाव मागेको हो ।

प्रवर्द्धक कम्पनीले बाँके ब्लक–२ सौर्य विद्युत आयोजनादेखि बाँके ब्लक–१ को स्वीचयार्डसम्म सिंगल सर्किट र त्यहाँबाट कोहलपुर सबस्टेसनसम्म डबल सर्किट प्रसारण लाइन निर्माण गर्नेछ । विभागका अनुसार यो प्रसारण लाइनको रुटमा ११.०५३१ हेक्टर जग्गा आवश्यक पर्नेछ ।

अनुमतिपत्र जारी भएपछि २०८० साल जेठ १५ गतेभित्र यो प्रसारण लाइन तयार गरी सञ्चालनमा ल्याउनु पर्ने तालिका तोकिने विभागले जनाएको छ । गोल्यान समूहको लगानी रहेको यो सौर्य विद्युत आयोजना अहिले निर्माणाधीन छ । यो सौर्य विद्युत आयोजनामा भारतको रेनेर्गो डेभलपर्स कम्पनी पनि जोडिएर काम गरिरहेको छ ।


Read Previous

अपि पावरले सिमरामा ५ मेगावाटको हरित हाइड्रोजन प्लान्ट राख्ने

Read Next

पोल भाडा नतिर्ने सेवा प्रदायकलाई फेरि प्राधिकरणको ताकेता, सम्झौता नगरी नयाँ सेवा विस्तार गर्न नपाइने

Leave a Reply

Your email address will not be published.