नेपाल पूर्वाधार 
काठमाडौं । प्रधानमन्त्री शेरबहादुर देउवाले ऊर्जा, सूचना प्रविधि, सडक लगायतका भौतिक पूर्वाधार निर्माण गर्दा गुणस्तरमा ध्यान पुर्याउन सम्पूर्ण इन्जिनियहरूलाई आग्रह गरेका छन् । नेपाल इन्जिनियर एसोसिएशन (एनइए) को ६०औं इन्जिनियर दिवसको अवसरमा राजधानीमा आयोजित कार्यक्रमलाई सम्बोधन गर्दै प्रधानमन्त्री देउवाले यस्तो आग्रह गरेका हुन् ।
उनले वर्तमान अवस्थामा पूर्वाधार आयोजनाको लागत बढ्ने तर, गुणस्तर खस्किने क्रम बढिरहेकाले यसलाई सुधार गर्नुपर्ने बताए । उनले द्रुत गतिमा पूर्वाधार निर्माणमार्फत देशको विकासमा इन्जिनियरहरूको भूमिका महत्त्वपूर्ण भएको पनि बताए ।
‘इन्जिनियर विकास र परिवर्तनका बाहक हुन्,’ प्रधानमन्त्री देउवाले भने, ‘अब नागरिकको जीवन दिगो र गुणस्तरीय बनाउनका लागि पनि इन्जिनियरहरूले भूमिका निर्वाह गर्नुपर्छ ।’ उनले मोल–मोलाई नगरी भौतिक प्रर्वाधार निर्माणको क्षेत्रमा काम गरिरहन समेत उनले आग्रह गरे ।
कार्यक्रममा भौतिक पूर्वाधार तथा यातायात मन्त्री मोहमद इस्तीयाक राईले संसदको चालु अधिवेशनबाटै ईन्जिनियर काउन्सिल ऐन चालु अधिवेशन मै पास गरिने बताए । संघीयता अनुसारको काउन्सिल ऐन नभएको भन्दै यसमा सुधारको जरुरी रहेको बताए ।
इन्जिनियरहरुको समेत भूमिका रहने विकासतर्फको खर्च ५८ प्रतिशत मात्र रहेको भन्दै उनले यसमा वृद्धि गर्न इन्जिनियर्सहरु लाग्नुपर्ने बताए । स्टाफ कलेज स्थापनाका लागि आफूले प्रयास गर्ने पनि उनले कार्यक्रममा बताए ।
दिवसमा एशोसियसनका अध्यक्ष डा. हरिबहादुर दर्लामी, निवर्तमान अध्यक्ष प्राडा त्रिरत्न ब्रजाचार्य, उपाध्यक्ष डा. नारायण अधिकारी, महासचिव रविभूषण झा लगायतले १८ बर्षदेखि उठान गरिएको स्टाफ कलेजको माग सरकारले पूरा गर्नुपर्ने बताए ।
