नेपाल पूर्वाधार 
काठमाडौं । नेपाल इञ्जिनियर्स एशोसिएसन ६० वर्ष पुरा गरी ६१ वर्षमा प्रवेश गरेको छ । नेपाली इञ्जिनियरहरुको छाता संगठनको रुपमा रहेको यसले नेपाली इञ्जिनियरहरुलाई संगठित गरी इञ्जिनियरिङ पेशाको विकास तथा पेशागत हकहितको संरक्षण र संवद्र्धन गर्दै आएको छ ।
देश विकासमा प्रत्यक्ष योगदान पुत्याउने उद्देश्यले स्थापना भएको यस संस्थाले हरेक वर्ष ३ साउनलाई ‘इञ्जिनियर दिवस’ को रुपमा मनाउने गरेको छ । यस वर्ष पनि विभिन्न कार्यक्रमहरु सहित मनाउने तयारी छ । मंगलबार काठमाडौंको प्रज्ञा भवनमा प्रधानमन्त्री शेर बहादुर देउवाले इञ्जिनियर दिवस समारोहको उद्घाटन गर्ने कार्यक्रम छ । कार्यक्रममा भौतिक पूर्वाधार तथा यातायात मन्त्री मोहम्मद इस्तियाक राईसमेत उपस्थित हुनेछन् ।
‘सामाजिक शसक्तिकरणका लागि इञ्जिनियर्स’ नारा तय
नेपाल इञ्जिनियर्स एशोसिएसनले ६० औ इञ्जिनियर दिवसको मूल नारा ‘सामाजिक शसक्तिकरणका लागि इञ्जिनियर्स’ तय गरेको छ । पूर्वाधार विकासमा महत्वपूर्ण भूमिका खेल्दै आएका इञ्जिनियरहरुको योगदानलाई समाजमा उजागर गर्ने उद्देश्यका साथ एशोसिएसनले काठमाडौं वाहेक प्रदेश राजधानी स्थित एशोसिएसनका प्रादेशिक तथा स्थानीय कार्यालयहरु धनगढी, सुर्खेत, बुटवल, पोखरा, हेटौडा, जनकपुर र विराटनगर र स्थानीय केन्द्र वीरगंज, हेटौडा, भरतपुर, दाङ, नेपालगंजमा समेत विविध कार्यक्रमहरुको गरी मनाउन लागिएको एसोशिएसनका महासचिव रवि भुषण झाले जानकारी दिए ।
इञ्जिनियर दिवसको अवसर पारेर सबै प्रदेश केन्द्रहरुमा स्थानीय अनुकूलता अनुसार रक्तदान कार्यक्रम, वृक्षारोपण, सरसफाई, विविध खेलकूदका कार्यक्रमहरु सम्पन्न भइसकेका छन् ।
इञ्जिनियर दिवसको अवसरमा ७ विद्यामा सम्मान गरिने
इञ्जिनियर समुदायको तर्फबाट समाज तथा राष्ट्रका लागि उत्कृष्ट योगदान पुयाउनु हुने इञ्जिनियर आर्किटेक्ट तथा संस्थालाई ७ विधामा सम्मान गरिने कार्यक्रम रहेको छ । त्यसरी सम्मान गरिने विद्याहरुमा लाइफटाइम एचिभमेण्ट अवार्ड, विशिष्ट उद्यमशील अवार्ड, सहिद इञ्जिनियर नवराज विष्ट मेमोरियल अवार्ड रहेका छन् । त्यस्तै, उत्कृष्ठ युवा व्यवसायिक अवार्ड, उत्कृष्ठ महिला इञ्जिनियर अवार्ड, इञ्जिनियर्स एप्रिशिएसन अवार्ड र बेष्ट इन्नोभेशन अवार्ड रहेका छन् ।
‘मुलुकको विकासमा सदैव समर्पित इन्जिनियर समुदायको भूमिका र जिम्मेवारी दिनानुदिन बढ्दै गएको नेपाल इञ्जिनियर्स एसोशिएसनका अध्यक्ष हरिवहादुर दर्लामीले बताए । ‘सरकारले वार्षिक बजेटमार्फत ल्याएका विकास निर्माणका कामलाई निर्धारित समयमा सम्पन्न गरी गुणस्तरीय रुपमा अपेक्षित प्रतिफल दिन सक्ने अवस्थामा पुयाउन सक्यौं भने नेपाली जनताले हाम्रो योगदान र सेवाको अवश्य कदर गर्नेछन’ उनले भने । यसका लागि विकासका कार्यक्रम लिएर जनताको घरदैलोमा पुग्ने इन्जिनियरहरुको सेवालाई अधिकार सम्पन्न बनाउनु सरकारको कतव्यं भएको उनको भनाइ छ ।
दुई प्राविधिक सत्र सञ्चालन हुने
इञ्जिनियर दिवसको उद्घाटन समारोह पश्चात प्राविधिक सत्र चल्नेछ । आयोजकले दिएको जानकारी अनुसार प्राविधिक सत्रलाई दुइ भागमा विभाजन गरिएको छ । पहिलो सत्र दीगो सहरी विकासको लागि फोहोर व्यवस्थापन विषयमा छलफल हुनेछ । यस सेसनको अध्यक्षता एसोशिएसनका पूर्व अध्यक्ष महेन्द्र बहादुर गुरुङले गर्नेछन । कार्यपत्रको प्रस्तुतीकरण ई डा हुण्डीराज पाठकको रहनेछ । प्यानलिष्टको रुपमा पूर्व प्रधानमन्त्री डा. बाबुराम भट्टराई, गगन कुमार थापा र काठमाडी महानगरपालिका मेयर बालेन्द्र शाह रहने कार्यक्रम छ ।
दोस्रो सत्र भने स्थानीय सरकारको सेवा प्रवाहमा आइसीटीको प्रयोगमा केन्द्रित छ । यस सत्रको अध्यक्षता एशोसिएसनका पूर्व अध्यक्ष भोजराज रेग्मीले गर्नेछन । कार्यपत्र आनन्दराज खनालले प्रस्तुत गर्नेछ भने प्यानलिष्टको रुपमा ललितपुर महानगरपालिकाका मेयर चिरिबाबु महर्जन, भक्तपुर नगरपालिकाका उपप्रमुख रजनी जोशी श्रेष्ठ र संघीय मामिला तथा सामान्य प्रशासन मन्त्रालयका सचिव सुरेश अधिकारी, इञ्जिनियरिङ अध्ययन संस्थान पुल्चोकका डिन प्रा डा शशीधर राम जोशी रहेका छन् ।
