नेपाल पूर्वाधार 
काठमाडौं। गत भदौ १० गते भोटेकोशी र त्रिशूली नदीमा आएको बाढीबाट उक्त क्षेत्रमा ठूलो क्षति पुगेको छ । नेपाल विद्युत् प्राधिकरणका अनुसार बाढीका कारण प्राधिकरण र उसका सहायक कम्पनीका विद्युत् उत्पादन तथा प्रसारण संरचनामा करिब ७४ अर्ब रुपैयाँ बराबरको प्रारम्भिक क्षति भएको अनुमान गरिएको छ ।
बाढीका कारण माथिल्लो त्रिशूली-३ बीको २२० केभी हबमा क्षति पुगेको छ । त्यस्तै, विभिन्न जलविद्युत् केन्द्रमा समेत क्षति पुगेका कारण ४३० मेगावाट विद्युत् उत्पादन प्रणालीबाट बाहिर रहेको प्राधिकरणले जनाएको छ ।
भोटेकोशी र त्रिशूली नदीमा आएको बाढीले जलविद्युत् आयोजना, प्रसारण संरचना तथा अन्य विद्युतीय पूर्वाधारमा क्षति पुर्याएको हो । क्षतिका कारण केही जलविद्युत् केन्द्रबाट विद्युत् उत्पादन तथा प्रसारण प्रभावित भएको छ ।
प्राधिकरणले क्षतिग्रस्त संरचनाको विस्तृत मूल्यांकन तथा पुनःस्थापनाको काम अघि बढाएको जनाएको छ । प्रारम्भिक रूपमा गरिएको क्षतिको अनुमान विस्तृत मूल्यांकनपछि थप यकिन हुने प्राधिकरणले जनाएको छ ।
प्राधिकरणका अनुसार क्षतिग्रस्त संरचनाको पुनःस्थापना गरी विद्युत् उत्पादन तथा प्रसारण प्रणालीलाई नियमित अवस्थामा फर्काउन आवश्यक प्राविधिक काम भइरहेको छ ।
