नेपाल पूर्वाधार 
काठमाडौँ। ट्रायम्फ मोटरसाइकल्स नेपालले नाइमा नेपाल मोबिलिटी एक्स्पो २०२६ मा आफ्नो नयाँ आधुनिक क्लासिक रोडस्टर ट्रायम्फ स्पिड टी४ सार्वजनिक गरेको छ। नयाँ मोटरसाइकलको मूल्य ६ लाख ४९ हजार ९०० रुपैयाँ तोकिएको छ।
स्पिड टी४ को सार्वजनिकसँगै नेपालमा ट्रायम्फको ४०० सीसी क्षमताको मोटरसाइकलको शृङ्खला थप विस्तार भएको कम्पनीले जनाएको छ। क्लासिक रोडस्टर डिजाइन, कम गतिमा राम्रो टर्क र सहज ह्यान्डलिङलाई केन्द्रमा राखेर मोटरसाइकल तयार गरिएको कम्पनीको भनाइ छ।
स्पिड टी४ मा ३४९ सीसी क्षमताको तरल पदार्थबाट चिस्याइने इन्जिन रहेको छ। उक्त इन्जिनले ७ हजार ५०० आरपीएममा २९ पीएस शक्ति र ५ हजार ५०० आरपीएममा ३१ एनएम टर्क उत्पादन गर्छ। यसमा ६-स्पिड गियरबक्स र स्लिपर क्लच दिइएको छ।
कम्पनीका अनुसार मोटरसाइकल सहरमा दैनिक आवतजावत, राजमार्गमा लामो दूरीको यात्रा तथा उकालो सडकमा समेत प्रयोगका लागि उपयुक्त हुने गरी डिजाइन गरिएको छ।
मोटरसाइकलमा ४३ एमएम अगाडिको फोर्क, समायोजन गर्न मिल्ने पछाडिको मोनोशक, १७ इन्चका पाङ्ग्रा, ३०० एमएम अगाडिको डिस्क र २३० एमएम पछाडिको डिस्क ब्रेक दिइएको छ। सुरक्षाका लागि दुईवटै पाङ्ग्रामा एबीएस प्रविधि उपलब्ध छ।
त्यस्तै, स्पिड टी४ मा एलईडी बत्ती, दिवा समयमा चल्ने बत्ती, स्लिपर क्लच तथा एनालग–डिजिटल डिस्प्ले पनि रहेको छ।
नाइमा नेपाल मोबिलिटी एक्स्पो २०२६ मा स्पिड टी४ को सार्वजनिकसँगै ट्रायम्फले नेपालमा आफ्नो आधुनिक क्लासिक मोटरसाइकलको शृङ्खलालाई थप विस्तार गरेको छ। कम्पनीले नयाँ मोटरसाइकल नेपालभरका आधिकारिक विक्रेतामार्फत बिक्री तथा सर्भिस उपलब्ध गराउने जनाएको छ।
