नेपाल पूर्वाधार 
काठमाडौं । नेपाल विद्युत प्राधिकरणको ६६/११ केभी लैनचौर सबस्टेसनबाट प्रवाह हुने विद्युत सेवा कात्तिक ४ गतेसम्म प्रभावित हुने भएको छ । स्तरोन्नति गर्नु परेका कारण सबस्टेसनबाट सञ्चालित फिडरको विद्युत सेवा प्रभावित हुने भएको हो ।
अहिले सबस्टेसनबाट सञ्चालित सामाखुशी, ठमेल, किङ्सवे, लाजिम्पाट र पानी पोखरी फिडरको विद्युत सेवा अवरुद्ध हुन पुगेको प्राधिकरण काठमाडौं ग्रिड महाशाखाले जनाएको छ ।
ग्रिड महाशाखाका अनुसार सबस्टेसनको स्तरोन्नति अवधिभर त्यस क्षेत्रमा भृकुटीमण्डप, कमलपोखरी, डिल्लीबजार, क्षेत्रपाटी, असन, महाबौद्ध, न्यूरोड, पुतलीसडक, गोंगबु, रानीबारी र बालुवाटार क्षेत्रबाट वैकल्पिक आपूर्तिको व्यवस्था गरिएको छ ।
सबस्टेसनको स्तरोन्नतिपछि सम्बन्धित फिडरबाटै विद्युत आपूर्ति सुचारु गरिने पनि ग्रिड महाशाखाले जनाएको छ । सबस्टेसन ओभरलोड हुन गएका कारण स्तरोन्नति गर्ने कार्य अगाडि बढाइएको प्राधिकरणले जनाएको छ ।
