नेपाल पूर्वाधार 
मलेखु । नेपाल विद्युत प्राधिकरणले धादिङमा उठाउन बाँकी विद्युत बक्याैता ४१ कराेड रुपैयाँ नाघेकाे छ । प्राधिकरण धादिङ वितरण केन्द्र अन्तर्गत जिल्लामा ४१ करोड ३८ लाख ४५ हजार रुपैयाँ विद्युत् बक्याैता उठ्न बाँकी देखिएकाे हाे ।
प्राधिकरण धादिङ वितरण केन्द्र प्रमुख माधव न्यौपानेका अनुसार धुनिबेँसी नगरपालिकामा सञ्चालित युनाइटेड सिमेन्ट उद्योगले मात्र २७ करोड ५९ लाख ६४ हजार रुपैयाँ महसुल तिर्न बाँकी छ । महसुल नतिर्ने १ हजार ७ सय ४८ जनाको विद्युत लाइन काटिए पनि एक सय ७७ ग्राहकले अझैसम्म महसुल तिरेका छैनन् । १ सय ३ जना उपभोक्तालाई प्राधिकरणले कालोसूचीमा राखेको छ ।
विद्युत लाइन काटेपछि ४ करोड २६ लाख ७४ हजार रुपैयाँ बक्याैता असुली गरेको न्यौपानेले जानकारी दिए । कालोसूचीमा परेका उपभोक्ताबाट ३७ लाख १२ हजार रुपैयाँ असुल गर्न बाँकी छ । धादिङ वितरण केन्द्रले आर्थिक वर्ष (२०७९/८० ) मा एउटा ग्राहकको रकम उठाउन काठमाडाैं र भक्तपुरमा समेत उनीहरूको घरमा लाइन काटेको प्रमुख न्यौपानेले बताए ।
धादिङमा विद्युत् चोरीको घटना पनि गत वर्षको तुलनामा बढेका छन् । चुहावट रोक्न बन्द मिटर फेर्ने, तारले छोएका रुख काट्ने, नाङ्गो तारलाई कालो तारमा रुपान्तरण गर्ने तथा ट्रान्सफर्मर थप गरेर विद्युत् सञ्चालन गरे पनि चोरी नियन्त्रणमा आउन सकेको छैन । गत आवमा विद्युत् चोरी गर्ने २ सय ९४ जनालाई कारबाही गरिएको थियो ।
उनीहरूबाट १४ लाख ८१ हजार रुपैयाँ जरिवाना असुल गरिएको उनले बताए । अघिल्लो आवमा १ सय २३ जनालाई विद्युत् चोरीअन्तर्गत कारबाही गरिएको थियो । गत आवमा ११ करोड २२ लाख ९१ हजार ६ सय ९ युनिट विद्युत बिक्री गरी १ अर्ब दुई करोड रकम सङ्कलन भएको वितरण केन्द्रले जनाएको छ ।
