नेपाल पूर्वाधार 
काठमाडौं । चालू आर्थिक वर्षमा करोडौँ रुपैयाँको विद्युतीय सवारीको चार्जर आयात गरिएको छ । भन्सार विभागको तथ्यांकअनुसार ५ महिनाको अवधिमा २३ करोड ३५ लाख रुपैयाँभन्दा बढीको सवारी चार्जर आयात भएको हो।
चालू आर्थिक वर्षमा विद्युतीय सवारीको आयात बढेसँगै सवारीको चार्जर आयात समेत बढेको देखिएको छ । यस अवधिमा नेपालमा ७८ हजार ६४७ वटा एसी/डीसी सवारी चार्जर आयात भएको हो । यसबापत राज्यले १ करोड ५ लाख ७७ हजार रुपैयाँ राजश्व असूली गरेको छ।
विश्वका ७ वटा मुलुकबाट सवारी चार्जर आयात हुने गरेपनि चीन र भारतबाट सबैभन्दा धेरै आयात भएको छ। यस अवधिमा चीनबाट २१ करोड ६८ लाख रुपैयाँको सवारी चार्जर आयात हुँदा भारतबाट १ करोड ४३ लाख ३५ हजारको चार्जर आयात भएको छ।
यस्तै, नेपालबाट मोबाइल फोनको चार्जर आयातमा ६ करोड ४६ लाख रुपैयाँ बाहिरिएको छ । भन्सार विभागको तथ्यांकअनुसार ५ महिनाको अवधिमा चार्जर आयातमै करोडौं रुपैयाँ बाहिरिएको हो। तथ्यांकअनुसार चीनबाट ४ करोड ३० लाखको चार्जर आयात हुँदा भारतबाट १ करोड ४१ लाखको चार्जर आयात भएको छ।
