नेपाल पूर्वाधार 
काठमाडौ । बुद्ध एयरले सुर्खेत विमानस्थलमा आईएफआर प्रविधि जडान गर्न सरकारसँग आग्रह गरेको छ ।
देशका अन्य विमानस्थलमा जस्तै सुर्खेतमा पनि आईएफआर प्रविधि जडान भएमा उडान भर्न सजिलो हुने बुद्ध एयरको भनाइ छ । आईएफआर प्रविधिमा कम भिजिविलिटीमा पनि उडान भर्न सकिन्छ ।
सुर्खेत विमानस्थलमा भिएफआर प्रविधिमा सञ्चालनमा रहेको छ । यस प्रविधिमा मौसम प्रतिकुल र ढिला हुँदा उडान रद्द हुने सम्भावना प्रवल रहन्छ ।
आईएफआर प्रविधि जडान भएमा साँझ राती पनि उडान भर्न मिल्ने हुँदा यात्रुलाई आफ्नो समय अनुकुल आउजाउ गर्न थप सहज हुनेछ ।
आईएफआर प्रविधि र सुर्खेत विमानस्थललाई यात्रुमैत्री बनाउनका लागि नागरिक उड्डयन प्राधिकरण तदारुकताका साथ लागेको छ । यसमा प्रदेश तथा संघीय सरकारले पनि प्रभावकारी भूमिका निर्वाह गर्नका लागि बुध्द एयरले अनुरोध गरेको छ ।
अहिले बुद्ध एयरले सुर्खेतबाट काठमाडौंको सिधा उडान सञ्चालन गरिरहेको छ । शुरुका दिनमा सानो जहाजबाट उडान सञ्चालन गरेको र पछि एटीआर–४२ जहाजबाट उडानलाई निरन्तरता दिएको थियो ।
एटीआर–४२ जहाजबाट उडान सञ्चालन भएपछि भाडादर केही सहज र सरल भएको थियो ।
नागरिक उड्डयन प्राधिकरणको अगुवाई र सहयोगमा बुध्द एयरले १६ डिसेम्बरबाट कर्णाली प्रदेशको राजधानी सुर्खेतमा एटीआर–७२ जहाजबाट उडान सञ्चालन गरेको छ ।
ठूलो जहाजबाट उडान भर्दा भाडादर पनि थप सहज र सरल भएको बुद्ध एयरको भनाइ छ । यात्रुहरुको माग र अनुरोधलाई ध्यानमा राखी बुध्द एयरले २१ डिसेम्बरबाट अर्काे उडान पनि भर्ने जनाएको छ ।
यसरी दिनको दुई उडानले यात्रुलाई त्यसैदिन आफ्नो कार्य सकि आउजाउ गर्न सजिलो हुने अपेक्षा गरिएको छ ।
