नेपाल पूर्वाधार 
काठमाडौं । संघीय सरकारले प्रदेश-१ काे सुनसरी जिल्लास्थित धरान उप-महानगरपालिकाकाे खानेपानी समस्या अन्त्यका लागि सहयाेग गर्ने प्रतिबद्धता जनाएकाे छ । अर्थ मन्त्रालयले उप-महानगरले वर्षाैंदेखि झेल्दै आएकाे सफा स्वच्छ खानेपानीकाे समस्या अन्त्य गर्न पूर्ण सहयाेग गर्ने प्रतिबद्धता जनाएकाे हाे ।
उप-महानगरका मेयर हर्क साम्पाङ्गले मंगलबार अर्थमन्त्री जनार्दन शर्मालाई भेटी खानेपानीकाे समस्या समाधानका लागि गुहारेपछि मन्त्रालयले सहयाेग गर्ने प्रतिबद्धता जनाएकाे छ । साम्पाङसँगकाे भेटमा अर्थमन्त्री शर्माले मन्त्रालयले प्राविधिक तयारी सकिएपछि खानेपानी आयोजना सम्पन्न गर्न आवश्यक बजेटकाे जाेहाे गर्न उप-महानगरलाई सहयोग गर्ने आश्वसन दिए ।
मन्त्री शर्माले मेयर साम्पाङ्ग र उनकाे टीमले धरानका जनताको खानेपानी समस्या समाधानका लागि गरिरहेकाे जनपरिचालनले देशभरमा राम्राे सन्देश दिएकाे बताए । ‘तपाईंले अहिले खानेपानीको समस्या समाधानका लागि गरिरहेको जनपरिचालन निक्कै उदाहरणीय छ । अरु स्थानीय सरकारले पनि यसकाे अनुशरण गर्न सक्छन्’, उनले भने ।
भेटमा मेयर साम्पाङ्गले धरानमा खानेपानीको मुख्य समस्या रहेको र यसलाई समाधान गर्न संघीय सरकारको सहयोग आवश्यक परेकाे बताए । उनले संघीय सरकार स्थानीय तहकाे अविभावक भएकाले पनि समस्या परेकाे बेलामा प्राविधिक तथा वित्तीय स्राेत जुटाउन सहयाेग गरिदिनु पर्नेमा जाेड दिए ।
