नेपाल पूर्वाधार 
काठमाडौं। दक्षिण एशियाकै प्रमुख अन्तर्राष्ट्रिय साहित्यिक जमघटमध्ये एक मानिने ‘हिमालयन लिटरेचर फेस्टिभल एण्ड राइटर्स वर्कशप २०२६’ आजदेखि काठमाडौंमा शुरू भएको छ। आठ दिनसम्म चल्ने यस महोत्सवमा नेपालसहित विभिन्न देशका कवि, उपन्यासकार, संस्मरण लेखक, अनुवादक, चलचित्रकर्मी, विद्वान्, पत्रकार तथा उदाउँदा लेखकहरूको सहभागिता रहेको छ।
एनसेल फाउन्डेसनको सहकार्यमा आयोजित यस वर्षको महोत्सव नेपाली साहित्यकार गुरु प्रसाद मैनालीको योगदानप्रति समर्पित गरिएको छ। मे २९ देखि जुन ५ सम्म चल्ने कार्यक्रम हिलिङ, चेतना, सिर्जनशीलता, स्मृति तथा तीव्र रूपमा परिवर्तन भइरहेको विश्वमा सांस्कृतिक संवादका विषयमा केन्द्रित छ।
महोत्सवमा मास्टर क्लास, कार्यशाला, मुख्य वक्तव्य, कविता वाचन, साहित्यिक संवाद, चलचित्र प्रदर्शन, सांस्कृतिक भ्रमण तथा साहित्य र कलाको रूपान्तरणकारी शक्तिबारे अन्तरविषयक छलफलहरू हुनेछन्।
यस संस्करणमा पुलित्जर पुरस्कार विजेता कवि ट्रेसी के. स्मिथ र पल मल्डुन, चर्चित उपन्यासकार जीन ह्यान्फ कोरेलिट्ज, कवि तथा अनुवादक टोनी बार्नस्टोन, हिमालयन कवि युयुत्सु शर्मा, आइरिश साहित्यिक सम्पादक मार्टिन डोयल तथा ब्रुकलिनका ‘पोएट लौरिएट’ टिना चाङलगायत नेपाल, भारत, आयरल्यान्ड, अस्ट्रिया, पोल्यान्ड, अमेरिका र अन्य देशका साहित्यिक व्यक्तित्वहरूको सहभागिता रहेको छ।
