नेपाल पूर्वाधार 
काठमाडौं । काठमाडौंलाई हेटौंडासँग जोड्ने वैकल्पिक मार्गका रूपमा रहेको थानकोट-चित्लाङ सडक खण्डअन्तर्गत पहिले ट्रयाक खुलेका धेरै खण्डको स्तरोन्नति हुन सकेको छैन । काठमाडौंतर्फको सडक खण्ड स्तरोन्नति गर्नुपर्ने भए पनि दैनिक धेरै सवारी साधनको आवागमन हुने गरेकाले दुई किलोमिटरबाहेक अन्यत्र स्तरोन्नतिको काम अघि बढ्न सकेको छैन ।
बजेट अभावका कारण स्तरोन्नतिको काम अगाडी बढ्न नसकेको काठमाडौंस्थित सडक डिभिजन कार्यालयले जनाएको छ । काठमाडौंबाट जाने सडक ट्रयाक खुलेर कटिङमात्र गरिएको छ । “ठाउँ–ठाउँमा कहिलेकाहीं मर्मत हुने गरेको भए पनि स्तरोन्नति गर्नुपर्ने आवश्यकता छ । सडक डिभिजनसँग स्तरोन्नतिका लागि बजेट छैन”, कार्यालयका इञ्जिनियर नेत्र पौडेलले भने ।
बल्खुबाट फर्पिङ हुँदै हेटौंडातर्फ सडक निर्माण भइरहेको छ । यहाँ गाडीको चाप बढी हुने हुँदा मर्मत गरिएका सडक पनि चाँडो बिग्रिरहेको उनकाे भनाइ छ ।
थानकोटबाट साढे २ किलाेमिटर सडक मात्रै कालोपत्र गरिएको छ । त्यहाँबाट काठमाडौंसम्म ६ किलाेमिटर सडक बिग्रिएको छ । मोड बढी हुनुका साथै बाटोको ग्रेड पनि बढी भएकाले मर्मत गरिएका सडक बिग्रिरहेको जनाइएको छ । चित्लाङको दुई किमी कालोपत्र भइरहेको छ । थानकोटतर्फ धेरै स्थानमा बाटो बिग्रिएकाले स्तारोन्नतिमा समस्या भइरहेको सडक डिभिजन कार्यालयले जनाएकाे छ ।
गत वर्ष चित्लाङ बजारबाट थानकोटतर्फको २ किमी सडक कालोपत्रेका लागि ठेक्का भएको थियो । अहिले भइरहेको स्तरोन्नतिको काम चालू आर्थिक वर्षभित्र सकिने इञ्जिनियर पौडेलले जानकारी दिए । थानकोट–चित्लाङ सडक खण्डलाई गणेशमान सिंह मार्ग नामकरण गरिएको छ । मकवानपुरतर्फ पनि विभिन्न खण्डमा सडक मर्मत भइरहेको छ ।
