नेपाल पूर्वाधार 
काठमाडौं । शहरी विकास मन्त्री मेटमणि चौधरीले निर्माणाधीन सरकारी संरचनामा भइरहेको ढिलाईप्रति असंतुष्टि जनाएका छन् ।
मन्त्रालय सम्हाले लगत्तै उपत्यकाभित्र निर्माणाधीन ठूला संरचनाको एकसरो अनुगमन गरेका मन्त्री चौधरीले पुनः ती संंरचनाको अनुगमण सुरु गरेका छन् ।
शनिबार भैंसेपाटीमा निर्माणाधीन संघीय मन्त्री, सभामुख, मूख्यमन्त्री तथा प्रदेश प्रमुखका निवासहरुको स्थलगत निरिक्षण लगत्तै मन्त्री चौधरीले सरोकारवाला विभाग, ठेकेदार कम्पनीसँग छलफल गरेका छन् ।
मन्त्रीले ‘काममा किन ढिलाई भइरहेको छ ? ५ महिनापछि आउँदा पनि अवस्था किन उस्तै छ ? ढिलाई गर्दा कमिसन बढ्छ ?’ भनेर प्रश्न गरेका थिए । मन्त्रीको प्रश्न सुनेर मुखामखु गरेका कर्मचारीले कोभिडका कारण ढिलाई भएको बताए ।
‘कोभिड त सकिएन र ?’ लगत्तै मन्त्रीले प्रश्न गरे । ‘स्थानीयले दुःख दिँदा काम गर्न सकिएन हजुर ।’ भनेर कर्मचारीले जवाफ दिए । अन्तिममा मन्त्रीले ‘के उपाय गरेर हुन्छ, काम छिटो सक्नुस् । मैले के गर्नु पर्याे मलाई भन्नुस् ।’ भने ।
त्यसपछि शहरी मन्त्री चौधरी नारायणहिटी राजदरबार परिसरभित्र रहेको गणतन्त्र स्मारकको निरिक्षण गरे । त्यहाँ पनि सोचे अनुरुप प्रगति नदेखेपछि मन्त्री चौधरी थप असंतुष्ट बनेका छन् ।
सरोकारवाला पक्षलाई उनले छलफलका लागि आज (आइतबार) मन्त्रालयमा छलफल गर्दैछन् ।
