काठमाडौं । मेलम्ची नदीको पानी पुनः काठमाडौं पथान्तरणको लागि सुरूङ भर्ने कार्य सोमबार (१२ मंसिर) देखि शुरु गरिएको छ ।
अवको केही दिनमा मेलम्चीको पानी काठमाडौंको थोक वितरण प्रणालीमा पठाइने मेलम्ची खानेपानी विकास समितिले जानकारी दिएको छ । ‘तत्कालको लागि अस्थायी रूपमा सुरुङमा पानी पठाउन थालिएको छ’ समितिका सूचना अधिकारी राजेन्द्र प्रसाद पन्तले भने ।
कुल २६ किलोमिटर सुरुङ भरिएपछि सुन्दरीजलमा पानी खस्नेछ र उपभोक्तालाई वितरणका लागि उपलब्ध हुने छ । यसअघि कात्तिक अन्तिम हप्तादेखि वर्षाका कारण अवरुद्ध मेलम्चीको पानी काठमाडौं पठाउनका लागि काम सुरु गरिएको थियो ।
वर्षायाममा क्षति हुनसक्ने भन्दै गत जेठमा बन्द गरिएको सुरुङ हालसम्म सञ्चालन आएको थिएन । यस वर्ष सुरुङमा खासै क्षति नभए पनि आयोजना स्थलसम्म पुग्ने सडक अधिकांश बिग्रिएको थियो । सडक निर्माणको काम सम्पन्न भइसकेको छ ।
यसअघि आयोजनाको टोली मुहान मर्मत र आवश्यक उपकरणसहितको खोला डाइभर्टलगायत काम गरिरहेको थियो । २०७८ असार १ को बाढीले आयोजनाको बाँध र हेडवक्र्समा क्षति पुर्याएपछि मर्मत गरी २०७९ वैशाख ११ गतेदेखि जेठ तस्रो सातासम्म पानी लगिएको थियो ।
२०७८ असार १ गते सुपरीवेक्षण गर्नका लागि भन्दै सुरुङ बन्द गरेकै दिनमा ठूलो बाढी आएर मेलम्चीको हेडवक्र्स क्षेत्रमा क्षति पुगेको थियो । गेग्रान हटाउने कार्य चिनियाँ निर्माण कम्पनी सिनो हाइड्रो पावरले गरिरहेको छ ।
