नेपाल पूर्वाधार 
काठमाडौं । पाँच खपन जलविद्युत प्रालिले प्रवर्द्धन गर्न लागेको ६.८४८ मेगावाट क्षमताको लोअर हेवा खोला जलविद्युत आयोजनामा दुई बैंकबाट ९८.१७ करोड रुपैयाँ ऋण लगानी हुने भएको छ ।
सिद्धार्थ बैंक लिमिटेडको अगुवाइमा राष्ट्रिय वाणिज्य बैंक लिमिटेडले सह–लगानी गर्ने गरी आज वित्तीय व्यवस्थापन सम्झौतामा हस्ताक्षर गरिएको हो ।
आयोजनामा सिद्धार्थ बैंकले ५० करोड रुपैयाँ र राष्ट्रिय वाणिज्य बैंकले ४८.१७ करोड रुपैयाँ ऋण उपलब्ध गराउनेछन् । दुई बैंकले मिलेर आयोजनाको कुल लागतको ७० प्रतिशत (९८.१७ करोड रुपैयाँ) ऋणस्वरूप लगानी गर्ने र बाँकी ३० प्रतिशत लगानी प्रवर्द्धकबाट जुटाइनेछ। आयोजनाको कुल लागत १४०.२५ करोड रुपैयाँ रहेको छ ।
आयोजनाको इलेक्ट्रो–मेकानिकल निर्माण ठेक्का अष्ट्रियाको जेपर्ट ग्रुप (Geppert Group) सँगको सहकार्यमा अगाडि बढाइएको छ । प्रवर्द्धक कम्पनीका अध्यक्ष बसन्त कुमार तामाङका अनुसार, यसअघि जेपर्टले अपर हेवा खोला (८.५ मेगावाट) र सुपर हेवा खोला (६ मेगावाट) जलविद्युत आयोजनामा उत्कृष्ट काम गरेको अनुभवका कारण यो आयोजना पनि उसैले पाएको हो ।
उनका अनुसार, सम्झौताअनुसार जेपर्टले एक वर्षभित्र सम्पूर्ण उपकरण आपूर्ति र जडानको काम सम्पन्न गर्नुपर्नेछ। तामाङले भने, “हामीलाई विश्वास छ, जेपर्टले समयमै गुणस्तरीय काम पूरा गर्नेछ।”
जेपर्ट ग्रुपका नेपालका निर्देशक राजकिशोर यादवका अनुसार, कम्पनीले हालसम्म नेपालका १९ वटा जलविद्युत आयोजनामा काम गरेको छ, जसमा ९ वटा आयोजना सञ्चालनमा आइसकेका छन्। भारतमा पनि कम्पनीले ५ वटा आयोजनामा ठेक्का पाएको छ, जसमा २ वटा सञ्चालनमा र ३ वटा निर्माणाधीन छन्।
आयोजनाका निर्देशक उदय कान्त झाका अनुसार, कम्पनीको १२८ वर्षभन्दा बढीको अनुभव रहेकोले लोअर हेवा खोला आयोजनामा पनि समयमै गुणस्तरीय काम सम्पन्न हुने विश्वास व्यक्त गरिएको छ।
उनका अनुसार, आयोजनाको कुल हेड १८१.९२ मिटर रहेको छ र यसले वार्षिक ४०.८२ गिगावाट आवर (GWh) विद्युत् उत्पादन गर्नेछ। आयोजनाबाट उत्पादित विद्युत् ३३ केभीको प्रसारण लाइन (३.८ किलोमिटर) मार्फत बनेश्वर सबस्टेशनमा जोडिनेछ।
हाल आयोजनाको निर्माण कार्य सुरु भइसकेको छ र निर्धारित समयमा सम्पन्न गर्ने लक्ष्य राखिएको छ ।
