नेपाल पूर्वाधार 
काठमाडौं । नेपालले उत्पादन गरेको ४० मेगावाट विद्युत बंगलादेश निर्माण गर्न आगामी साउन १३ गते (जुलाई २८) त्रिपक्षिय सम्झौता हुने भएको छ । विद्युत निर्यातकर्ता नेपाल, खरिदकर्ता बंगलादेश र भारतका ऊर्जा मन्त्रीहरूको उपस्थतीमा काठमाडौंमा त्रिपक्षिय सम्झौता हुने तय भएको हो ।
ऊर्जा, जलस्रोत तथा सिँचाईमन्त्री दीपक खड्काले भारतका ऊर्जा मन्त्री मनोहर लाल खट्टर र बंगलादेशका ऊर्जा मन्त्री नसरुद हमिदलाई त्रिपक्षिय सम्झौता गर्न निमन्त्रणा गरिसकेका छन् ।
३ वटै देशका ऊर्जा मन्त्रीको उपस्थितीमा नेपाल विद्युत प्राधिकरण, भारतको एनटिपिसी विद्युत व्यापार निगम (एनभिभिएन) र बंगलादेशको बंगलादेश पावर डेभलपमेन्ट बोर्ड (बिपिडिबी) बीच त्रिपक्षिय सम्झौता हुने तय भएको ऊर्जा मन्त्रालयले जनाएको छ । मन्त्रालयका अनुसार सम्झौतापछि नै बंगलादेशले बर्खामा नेपालबाट ४० मेगावाट विद्युत खरिद गर्न सुरु गर्नेछ ।
यसअघि बिपिडिबीले २०८० पुस १६ गते नेपालबाट ४० मेगावाट विद्युत ५ वर्षसम्म खरिद गर्न बोलपत्र (टेण्डर) आह्वान गरेको थियो । त्यस लगत्तै विद्युत प्राधिकरणले पनि विद्युतको दरसहितको बोलपत्र सम्बन्धी कागजात पेस गरेको थियो ।
विद्युत प्राधिकरणले पेश गरेको बोलपत्रको कागजात मूल्याङ्कन गरी बिपिडिबीले त्यसको स्वीकृत गरेपछि थप प्रक्रिया अगाडि बढेको थियो । विद्युत प्राधिकरणले ४०० केभी ढल्केबर–मुजफ्फरपुर अन्तरदेशीय प्रसारण लाइनमार्फत विद्युत निर्यात गर्नेछ । मुजफ्फरपुर सबस्टेसन पुगेको विद्युत बहरामपुर–भेरमारा प्रसारण लाइन हुँदै बंगलादेश पुग्नेछ ।
सहमतिअनुसार नेपालले बर्खामा जुन १५ देखि नोभेम्बर १५ सम्म बंगलादेशलाई ४० मेगावाट विद्युत दिनेछ । बंगलादेशको बिपिडिबीले विद्युत प्राधिकरणलाई प्रतियुनिटर ६.४ अमेरिकी डलर तिर्नेछ ।
