नेपाल पूर्वाधार 
काठमाडाैं । प्रधानमन्त्री एवं लगानी बोर्डका अध्यक्ष पुष्पकमल दाहाल र बोर्डद्धारा अघि बढाएका परियोजना विकासकर्ताबीच भेटघाट तथा अन्तरक्रिया कार्यक्रम आयोजना गरिएको छ ।
बोर्डबाट सहजीकरण भैरहेका सार्वजनिक निजी साझेदारी (पीपीपी) तथा निजी लगानीका परियोजनाहरूको प्रगति तथा सम्पादित कार्यहरूको सम्बन्धमा जानकारी दिने ताथ समस्या समाधानका लागि अघि बढाउनुपर्ने पहलबारे जानकारी आदानप्रदानका लागि भेटघाट तथा अन्तरक्रिया आयोजना गरिएको हो ।
अन्तरक्रियाको क्रममा अरुण तेश्रो तथा तल्लो अरुण जलविद्युत परियोजना, होंसी तथा हुवासिन सिमेन्ट नारायणी परियोजना, माथिल्लो कर्णाली जलविद्युत परियोजना, माथिल्लो मर्स्यांङ्गदी–२ अर्धजलासययुक्त जलविद्युत परियोजना, पश्चिम सेती जलाशययुक्त र सेती नदी–६ अर्ध–जलाशययुक्त जलविद्युत परियोजना, माथिल्लो त्रिशुली–१ जलविद्युत परियोजना डाबर नेपाल, चीन–नेपाल मैत्री औद्योगिक पार्क परियोजना, मुक्तिनाथ केवलकार परियोजनाका विकासकर्ताले परियोजनाका प्रगति, कार्यान्वयन तथा प्रमुख चुनौतीका बारेमा जानकारी दिएका थिए ।
उनीहरुले परियोजना अघि बढाउनका लागि केही प्रक्रियागत, नीतिगत तथा अदालतद्वारा गरिएको निर्णयको कारण आएका समस्या लगायतबारे जानकारी दिँदै यसकालाई सहज बनाउन सरकारले पहल गर्नुपर्ने बताए । प्रधानमन्त्री दाहालले परियोजना निर्माण कार्य निरन्तर अगाडि बढाउन र तोकिएकै समयमा सम्पन्न गर्न लगानी बोर्ड तथा नेपाल सरकारको तर्फबाट आवश्यक सहयोग तथा समन्वय गर्ने प्रतिवद्धता जनाएका थिए ।
लगानी बोर्डका प्रमुख कार्यकारी अधिकृत सुशील भट्टले सार्वजनिक निजी साझेदारी तथा लगानी ऐन, २०७५ तथा रणनीतिक योजनाले निर्दिष्ट गरे अनुरूप परियोजना विकास तथा व्यवस्थापन, लगानी प्रवद्र्धन, संस्थागत विकास र समन्वय, सहकार्य र साझेदारीका सम्बन्धमा जानकारी दिएका थिए ।
