नेपाल पूर्वाधार 
सर्लाही । भन्सार कार्यालय मलंगवा, सर्लाहीले चालू आर्थिक वर्षको छ महिनामा कूल लक्ष्यको ४४ प्रतिशत राजस्व संकलन गरेको छ।
साउनदेखि पुससम्म ४० करोड रुपैयाँ राजस्व संकलन गर्ने लक्ष्य रहेकोमा १७ करोड ३५ लाख ८६ हजार रुपैयाँ राजस्व संकलन भएको भन्सार कार्यालयका भन्सार अधिकृत नरेश साहले जानकारी दिए।
उनका अनुसार कार्यालयले चालू आवमा ७८ करोड ५० लाख ७६ हजार रुपैयाँ राजस्व संकलन गर्ने लक्ष्य राखेको छ। आव २०७८/७९ मा लक्ष्यको ८५ प्रतिशत र आव २०७७/७८ मा लक्ष्यको एक सय ७६ प्रतिशत राजस्व संकलन गरेको थियो।
अधिकृत साहका अनुसार राजस्वमा बढी योगदान गर्ने वस्तुको आयात घट्दा राजस्व संकलन प्रभावित भएको हो। आयात हुने वस्तुमा आलु, प्याज, कोइला, सख्खर, माछाको दाना, भेनियर र फर्मलडिहाइड छन्, भने धान र गहुँको आयात निर्यात बन्द छन्।
आयातकर्ताले एलसी खोलेर आयात गर्न अझै समय लाग्ने भएकाले आगामी दुई महिना यस्तै अवस्था रहने उनको भनाइ छ।
विश्वव्यापी रूपमा फैलिएको कोरोना संक्रमणका कारण लामो समय व्यापार व्यवसाय बन्द हुनु तथा जिल्लामा रहेका अन्य सात वटा छोटी भन्सार कार्यालय पनि बन्द हुँदा राजस्व संकलन प्रभावित भएको भन्सार कार्यालय मलंगवा, सर्लाहीले जनाएको छ।
