नेपाल पूर्वाधार 
काठमाडौं । उपप्रधान–मन्त्री एवम् भौतिक पूर्वाधार तथा यातायात मन्त्री नारायणकाजी श्रेष्ठले पूर्वाधारसम्बन्धी परियाेजनालाई द्रुत बनाउन ‘फाइल ट्र्याक रेकर्ड’ राख्ने व्यवस्था शुरु गर्न मन्त्रालय मातहतका महाशाखा र विभागहरुलाई निर्देशन दिएका छन् ।
‘कुन काम कति दिन वा अवधिमा हुनुनपर्ने हो त्यो समयमा पू्रा हुनुपर्छ’ उनले भने । त्यसको लागि कुन कर्मचारी वा हाकिमको टेबलमा कति दिन रोकियो भन्ने जानकारी राख्न शुरु गरिने उनको भनाइ छ ।
त्यसरी ट्र्याक रेडक राख्दा कुन हाकिमको टेबलमा कहिलेदेखि, कस्तो अवस्थामा त्यो फाइल रहेको छ भन्ने जानकारी राखिन्छ । यसले कुनै कर्मचारीले फाइल रोकेर ढिलाइ गरेको खण्डमा ढिलाइ गरेवापत जिम्मेवार हुनुपर्छ ।
उपप्रधानमन्त्री श्रेष्ठले पूर्वाधार परियोजना वा आम नागरिकलाई दिने सेवा सुविधाको रोक्न नमिल्ने बरु काम हुन नसक्ने अवस्थामा पनि हुन नसक्ने भनेर तुरुन्तै निर्णय गर्नुपर्ने बताए । ‘फाइल रोकेर राख्दा त्यसले गर्ने असर समग्र नेतृत्वप्रति नै नकरात्मक पर्नेछ’ उनले भने ।
उनले आइतबार मन्त्रालयमा पुगेर महाशाखा प्रमुखसँग मन्त्रालयको योजनाबारे ब्रिफिङ लिएका छन् । उपप्रधानमन्त्रीको सचिवालयका अनुसार आइतबार यातायात व्यवस्था विभाग, रेलवे लगायतका मन्त्रीलाई बिर्फिङ भएको छ ।
उनले मन्त्रालायमा सबै कर्मचारीलाई तोकिएको समयलाई कार्यालय आउनुपर्ने, आफ्नो कार्यकक्ष छोडेर बाहिर जाँदा वा नआएको अवस्थामा जानकारी दिनुपर्ने निर्देशन दिएका छन् । कुनै पनि कर्मचारीले दवाबमा आएर काम नगर्न र त्यस्तो अफठ्यारो अवस्थाम आएमा मन्त्रीलाई जानकारी दिन आग्रह गरे ।
सो क्रममा महाशाखा तथा विभाग प्रमुखले आफ्नो महाशाखा अन्तर्गतका समस्याहरू प्रस्तुत गरेका थिए । मन्त्रीले चाडै ती समस्या समाधानको प्रस्ताव ल्याउन समेत निर्देशन दिएका छन् । उनले अन्य विभागको ब्रिफिङ भोलि लिनेछन् ।
आइतबार नै उपप्रधान मन्त्री एबम् भौतिक पूर्वाधार तथा यातायात मन्त्री नारायणकाजी श्रेष्ठले मन्त्रालयको सबै महाशाखाको स्थलगत अवलोकन र अनुगमन गरेका छन् । सबै महाशाखालाई आफ्नो कार्यक्षेत्र र वरपरको क्षेत्रलाई सफा राख्नुपर्नेमा जोड दिए ।
