नेपाल पूर्वाधार 
काठमाडौं। सुनसरी-४ बाट निर्वाचित राष्ट्रिय स्वतन्त्र पार्टी (रास्वपा) का सांसद दीपक कुमार साह उद्योग, वाणिज्य तथा आपूर्तिमन्त्रीमा सिफारिस भएका छन्।
प्रधानमन्त्री बालेन शाहले रिक्त रहेको उद्योग, वाणिज्य तथा आपूर्ति मन्त्रालयको मन्त्री पदमा साहलाई नियुक्त गर्न राष्ट्रपति समक्ष सिफारिस गरेका हुन्। उनको सिफारिस पत्र राष्ट्रपति कार्यालय, शीतल निवास पुगिसकेको छ।
प्रधानमन्त्रीको सिफारिसमा राष्ट्रपतिले मन्त्री नियुक्त गर्ने संवैधानिक व्यवस्थाअनुसार साहलाई मन्त्रीमा नियुक्त गर्न सिफारिस गरिएको हो।
यसअघि आजै गौरीकुमारी यादवले उद्योग, वाणिज्य तथा आपूर्तिमन्त्री पदबाट राजीनामा दिएकी थिइन्। उनको राजीनामापछि रिक्त भएको मन्त्रालयको जिम्मेवारी साहलाई दिन प्रधानमन्त्रीले सिफारिस गरेका हुन्।
राष्ट्रपति कार्यालयका अनुसार साहको पद तथा गोपनीयताको शपथ आज साँझ साढे ५ बजे शीतल निवासमा हुनेछ।
साह मन्त्री नियुक्त भएपछि उद्योग, वाणिज्य तथा आपूर्ति मन्त्रालयले नयाँ नेतृत्व पाउनेछ।
