नेपाल पूर्वाधार 
काठमाडौं । विद्युत नियमन आयोगले कर्णाली प्रदेशको कालिकोट र डोप्ला जिल्लामा निर्माण हुन लागेका ३ अर्धजलाशय जलविद्युत आयोजनाको एकै दिन सार्वजनिक सुनुवाई गर्ने भएको छ । विभागले आगामी बुधबार (चैत ८ गते) यी जलविद्युत आयोजनाको विद्युत खरिद दर निर्धारण तथा विद्युत खरिद सम्झौता (पिपिए) मा सहमतिका लागि नेपाल विद्युत प्राधिकरणबाट पेश भएको निवेदन उपर सार्वजनिक सुनुवाई आयोजना गरेको हो ।
बिहान ११ बजेदेखि साँझ ५ बजेसम्म ३ वटा जलविद्युत आयोजनाको छुट्टा छुट्टै सार्वजनिक सुनुवाई गरिने आयोगका अध्यक्ष डिल्लीबहादुर सिंहले जानकारी दिए । उनका अनुसार एससी पावर कम्पनीले निर्माण गर्ने २९८.७५ मेगावाटको तिला–१ जलविद्युत आयोजनाको सार्वजनिक सुनुवाई हुँदैछ ।
विद्युत प्राधिकरणले अर्धजलाशय प्रकृतिको यो आयोजनाले उत्पादन गर्ने विद्युत बर्खा याममा प्रतियुनिट ४.८० रुपैयाँ र सुख्खा याममा पिकिङ अवधिका लागि प्रतियुनिट १०.५५ रुपैयाँ र नन–पिकिङ अवधिका लागि प्रतियुनिट ८.४० रुपैयाँ दरमा खरिद गर्ने प्रस्ताव आयोग समक्ष पेश गरेको छ ।
विद्युत प्राधिकरणले प्रस्ताव गरेको यो दरमा वार्षिक ३ प्रतिशतका दरले ८ पटकसम्म आयोजनाले मूल्यवृद्धि पाउनेछ । यो आयोजनाले सुख्खा याममा ६ घन्टासम्म पूर्ण क्षमतामा विद्युत उत्पादन गर्न सक्ने अध्ययनले देखाएको छ ।
आयोजना निर्माण सम्पन्न भई सञ्चालनमा आउँदा वार्षिक १७९०.३४ गिगावाट घन्टा विद्युत उत्पादन हुनेछ । यो आयोजनाको सार्वजनिक सुनुवाई बिहान ११ बजेदेखि १ बजेसम्म सञ्चालन हुने आयोगले जानकारी दिएको छ ।
यस्तै,यही कम्पनीले प्रवर्द्धन गर्ने २९६.७४ मेगावाटको तिला–२ जलविद्युत आयोजनाको पनि सार्वजनिक सुनुवाई हुने तय भएको आयोगले जनाएको छ । अर्धजलाशय प्रकृतिको यो आयोजनाको विद्युत पनि बर्खा याममा प्रतियुनिट ४.८० रुपैयाँ र सुख्खा याममा पिकिङ अवधिका लागि प्रतियुनिट १०.५५ रुपैयाँ र नन–पिकिङ अवधिका लागि प्रतियुनिट ८.४० रुपैयाँ दरमा खरिद गर्ने प्रस्ताव विद्युत प्राधिकरणले आयोग समक्ष पेश गरेको छ ।
आयोजनाको प्रवर्द्धक कम्पनीले विद्युतको यो दरमा ८ वर्षसम्म वार्षिक ३ प्रतिशतका दरले मूल्यवृद्धि पाउनेछ । यो आयोजनाले पनि सुख्खा याममा ६ घन्टा सम्म पूर्ण क्षमतामा विद्युत उत्पादन गर्नेछ ।अध्ययन अनुसार यो आयोजना निर्माण सम्पन्न भई सञ्चालनमा आउँदा वार्षिक १७९०.१६ गिगागा घन्टा विद्युत उत्पादन गर्न सकिनेछ ।
यो आयोजनाको सार्वजनिक सुनुवाई दिउँसो १ बजेदेखि ३ बजेसम्म सञ्चालन हुने आयोगले जनाएको छ । तिला–१ र तिला–२ दुवै आयोजना कणार्ली प्रदेशको कालिकोट जिल्लाको तिला गुफा गाउँपालिका, महाबु गाउँपालिका र खाडाचक्र नगरपालिकामा पर्दछन् ।
यसैगरी, बुधबार नै जगदुल्ला हाइड्रोपावर कम्पनीले निर्माण गर्न लागेको १०६ मेगावाटको जगदुल्ला अर्धजलाशय जलविद्युत आयोजनाको सार्वजनिक सुनुवाई हुँदैछ । विद्युत प्राधिकरणले यो आयोजनाको विद्युत खरिद दर बर्खा याममा प्रतियुनिट ४.८० रुपैयाँ र सुख्खा याममा पिकिङ अवधिका लागि प्रतियुनिट १०.५५ रुपैयाँ र नन–पिकिङ अवधिका लागि प्रतियुनिट ८.४० रुपैयाँ दिने प्रस्ताव सहितको आवेदन सुनुवाईका लागि आयोगमा पेश गरेको छ ।
आयोजनाको प्रवर्द्धक कम्पनीले विद्युतको यो दरमा ८ वर्षसम्म वार्षिक ३ प्रतिशतका दरले मूल्यवृद्धि पाउनेछ । डोल्पाको मुड्केखोला गाउँपालिकामा अवस्थित यो आयोजनाले सुख्खा याममा ४ देखि ६ घन्टासम्म पूर्ण क्षमतामा विद्युत उत्पादन गर्न सक्ने अध्ययनले देखाएको छ । आयोजनाको प्रवर्द्धक कम्पनीले उत्पादन अनुमतिपत्रका लागि आवेदन दिएको छ ।
आयोजना निर्माण सम्पन्न भई सञ्चालनमा आउँदा वार्षिक ६२३.४७ गिगावाट घन्टा विद्युत उत्पादन हुनेछ । यो आयोजनाको सार्वजनिक सुनुवाई दिउँसो ३ बजेबाट सुरु भई साँझ ५ बजे सकिने आयोगले जनाएको छ ।
सार्वजनिक सुनुवाई कार्यक्रममा यी आयोजनाबाट उत्पादन हुने विद्युतको खरिद–बिक्री दर निर्धारण तथा पिपिए सहमतिका लागि पेश भएको निवेदन उपर छलफल हुने आयोगले जनाएको छ । आयोगले सार्वजनिक सुनुवाई कार्यक्रममा विद्युत उपभोक्ता, उद्योगी, व्यवसायी, स्थानिय बासिन्दा, प्रतिनिधिमूलक संस्थाहरू, सञ्चार माध्यम, स्थानीय तहका प्रतिनिधि, तथा सम्बन्धित सबै सरोकारवालाहरूलाई सहभागिताका लागि आमन्त्रण गरेको छ ।
आयोगका अनुसार यी आयोजनासँग सम्बन्धित सरोकारवालाहरूले आयोगको कार्यालयमा लिखित रूपमा एवं आयोगको इमेल ठेगाना ([email protected]) मार्फत समेत आफ्ना राय, सुझाव तथा प्रतिकृया पेश गर्न सक्ने छन् ।
