नेपाल पूर्वाधार 
चितवन। जिल्लामा जारी राष्ट्रिय स्वतन्त्र पार्टी (रास्वपा) को महाधिवेशन स्थलमा राजनीतिक गतिविधिसँगै स्थानीय उत्पादनको व्यापार पनि बढेको छ। महाधिवेशनका कारण भएको ठूलो चहलपहलले चितवनका पहाडी क्षेत्र र चेपाङ समुदायले उत्पादन गर्ने रैथाने वस्तु ‘चिउरी’ को माग र बिक्रीमा उल्लेख्य वृद्धि भएको छ।
राष्ट्रिय स्वतन्त्र पार्टी को महाधिवेशनका कारण ठूलो संख्यामा मानिसहरूको उपस्थिति भएपछि नारायणगढ क्षेत्रका मण्डी तथा संकलन केन्द्रमार्फत ल्याइएका चिउरी महाधिवेशन स्थल आसपास बिक्री भइरहेका छन्। विशेषगरी चितवनका पहाडी क्षेत्रका चेपाङ समुदायले संकलन गरी ल्याएको चिउरी व्यापारीहरूले खरिद गरी बिक्री वितरण गरिरहेका छन्।
चेपाङ समुदायको पुर्ख्यौली बसोबास रहेको चितवनका पहाडी भेगहरू चिउरी उत्पादनका लागि प्रख्यात मानिन्छन्। यो फल विशेषगरी नेपालको महाभारत पर्वत शृङ्खला तथा भित्री मधेशका क्षेत्रमा पाइन्छ र जेठ–असारको गर्मी मौसममा पाक्ने गर्छ। गर्मीमा चिउरी सेवन गर्नु स्वास्थ्यका लागि लाभदायक मानिन्छ, जसले शरीरलाई शीतलता प्रदान गर्नुका साथै ऊर्जा समेत दिने बताइन्छ। यसको बीउबाट औषधीय गुणयुक्त घ्यू समेत उत्पादन गरिन्छ।
व्यापारिक रूपमा, महाधिवेशन स्थलमा चिउरी प्रतिकिलो रु. १०० मा खरिद गरी मागअनुसार रु. १२० देखि रु. १५० सम्ममा बिक्री भइरहेको छ। व्यापारीहरूका अनुसार महाधिवेशनको छोटो अवधिमै एक व्यवसायीले करिब ९० किलोसम्म चिउरी बिक्री गरिसकेका छन्।
राजनीतिक जमघटले स्थानीय तथा सिमान्तकृत समुदायका उत्पादनलाई बजार पहुँच र प्रवर्द्धनमा सहयोग पुगेको देखिए पनि सुरक्षा कारण देखाउँदै महाधिवेशन स्थल परिसरभित्र यस्ता व्यापारमा कडाइ गरिएको छ।
