नेपाल पूर्वाधार 
मुस्ताङ। जोमसोमस्थित २५ शय्याको प्रदेश अस्पताल जोड्ने सडक असहज भएपछि सेवाग्राहीलाई समस्या भएको छ । कालीगण्डकी करिडोर अन्तर्गत बेनी–जोमसोम–कोरला सडक आयोजनाले सडक स्तरोन्नति गर्ने क्रममा पुरानो सडक ग्रेड डाउन गरेपछि अस्पतालसम्म पुग्न कठिनाइ भएको हो ।
अस्पतालकाअनुसार सडक अवरोधका कारण एम्बुलेन्स तथा अन्य हलुका सवारीसाधन सञ्चालन गर्न समस्या भइरहेको छ ।अस्पताल जोड्ने सडकका लागि तीनवटा विकल्प प्रस्तुत गरिए पनि हालसम्म कुनै समाधान निस्कन नसकेको हो ।
पहिलो विकल्प मुख्य राजमार्गको सडक उकासेर अस्पतालतर्फको बाटो सहज बनाउने, दोस्रो विकल्प आयोजनाको योजनाअनुसार व्यक्तिको घरअगाडिबाट अस्पतालको सडक लैजाने र तेस्रो विकल्प हाल प्रयोग भइरहेको सडकलाई फराकिलो बनाउने रहेको थियो । तर प्रस्तुत गरिएका तीनवटै विकल्पमध्ये कुनै पनि कार्यान्वयनमा आउन सकेको छैन ।
प्रदेश अस्पतालका अनुसार अस्पताल जाने सडकको विषयमा स्थानीय प्रशासन, गाउँपालिका, अस्पताल व्यवस्थापन समिति तथा अन्य सरोकारवालाबीच पटक–पटक छलफल र संवाद भए पनि सहमति जुट्न सकेको छैन ।
सडक समस्या समाधान नहुँदा बिरामी, स्वास्थ्यकर्मी तथा सेवाग्राहीलाई दैनिक आवतजावतमा कठिनाइ भइरहेको स्थानीयले बताएका छन् ।
