नेपाल पूर्वाधार 
लमजुङ। लमजुङको बेँसीसहर नगरपालिका-१ दलालस्थित ७० मेगावाटको मध्यमर्स्याङ्दी जलविद्युत केन्द्रकाे विद्युत उत्पादनमा कमी आएकाे छ । मर्स्याङ्दी नदीमा पानीकाे सतहमा कमी आउँदा याे जलविद्युत केन्द्रकाे विद्युत उत्पादन घट्न पुगेकाे हाे ।
जडित क्षमता ७० मेगावाट भएपनि ४० प्रतिशत मात्रै विद्युत उत्पादन गरिरहेकाे जलविद्युत केन्द्र प्रमुख पवन बस्नेतले जानकारी दिए । उनका अनुसार नदीकाे बहावमा आधारित याे जलविद्युत केन्द्रका लागि पूर्ण क्षमतामा विद्युत उत्पादन गर्नका लागि पर्याप्त पानी नहुँदा ३० मेगावाट विद्युत घटेकाे छ ।
मंसिर महिनाबाटै जलविद्युत केन्द्रकाे उत्पादन क्रमशः घट्दै गएकाे उनले बताए । “एक महिना पहिलेदेखि विद्युत उत्पादन घट्न सुरु गरेकाे हाे । याे क्रम आगामी फागुनसम्म नै जारी रहनेछ,” उनले भने ।
याे जलविद्युत केन्द्र सन् २००८ मा निर्माण सम्पन्न भएको हो । जलविद्युत केन्द्र २७ अर्ब २० करोड रुपैयाँ लागतमा निर्माण सम्पन्न भएको हो ।
मध्यमर्स्याङ्दीसँगै जिल्लामा नेपाल विद्युत प्राधिकरण तथा निजी क्षेत्रबाट सञ्चालित नदीकाे बहावमा आधारित जलविद्युत केन्द्रकाे पनि विद्युत उत्पादन घटेकाे छ ।
जिल्लामा पिपुल हाइड्रोपावर कम्पनीले निर्माण गरेको दोर्दी गाउँपालिका-६ ढोडेनीस्थित ५४ मेगावाट क्षमताको सुपरदोर्दी ‘ख’ जलविद्युत केन्द्रबाट १८ मेगावाट मात्र विद्युत् उत्पादन भइरहेको साइट इन्चार्ज रमेश सिग्देलले जानकारी दिए ।
यस्तै, मर्स्याङ्दी गाउँपालिकास्थित भुलभुलेमा ५० मेगावाटको माथिल्लो मर्स्याङ्दी ‘ए’ जलविद्युत्, दोर्दी कोरिडोरमा रहेको हिमालयन पावर पार्टनर लिमिटेड कम्पनीले निर्माण गरेको २७ मेगावाटको दोर्दीखोला जलविद्युत्, दोर्दी गाउँपालिका–६ ढोडेनीमा लिवर्टी इनर्जी हाइड्रोपावरले निर्माण गरेको २५ मेगावाटको माथिल्लो दोर्दी ‘ए’ आयोजना, ४.४ मेगावाटको राँधी, तीन मेगावाटको मिदिम करापु तथा दुई मेगावाटको छ्याङ्दी जलविद्युत केन्द्रकाे विद्युत उत्पादनमा कमी आएकाे छ ।
