नेपाल पूर्वाधार 
टीकापुर (कैलाली) । कैलालीको जानकी गाउँपालिका–६ जगतपुरकाे विद्युत सेवा विगत १६ दिनदेखि अवरुद्ध छ । गत साउन १५ गते याे गाउँकाे वितरण ट्रन्सफर्मर पड्किएपछि अवरुद्ध भएकाे विद्युत सेवा अहिलेसम्म सुचारु हुन नसकेकाे हाे ।
विद्युत वितरण प्रणालीमा नयाँ ट्रन्सफर्मर जडान हुन नसक्दा जगतपुर गाउँका सयौँ परिवार अन्धकारमा बस्न बाध्य भएका छन् बर्खाको समयमा विद्युत सेवा अवरुद्ध हुँदा अन्धकारमा बस्न बाध्य भएको र दैनिकी कष्टकर बनेको स्थानीय बताउँछन् । बर्खाको समयमा राति बिजुली नहुँदा निकै कठिनाइ भएको स्थानीय नन्दबहादुर न्यौपानेले बताए ।
“राति अँध्यारोमा सर्प, किराको डर रहन्छ, त्यसैमाथि गर्मीले सुत्न सकिँदैन”, उनले भने, “१६ दिन वित्दा पनि बत्ती आउने कुनै टुङ्गो छैन ।” गाउँमा एकातिर गर्मी छ भने अर्कोतिर बाढीको त्रास छ । वर्षा हुनेबित्तिकै यहाँ बाढी आउने त्रासले नागरिकलाई सताउँछ । गर्मी, बर्खाको समयमा सर्प, किरा फट्याङ्ग्राको डर रहेका बेला विद्युत सेवा नहुँदा नागरिकलाई समस्या भएकाे छ ।
विद्युत नहुँदा सबैभन्दा बढी समस्या बालबालिका र वृवृद्धालाई भएको छ । “मेरा साना दुई बच्चा छन् । रातभरि सुत्न सक्दैनन्, रातभरि गर्मीले छट्पटाउँछन्”, स्थानीय समिरा चौधरीले भने, “गर्मीले घरमा बस्न सक्ने अवस्था छैन । साह्रै दुःख भयो ।”
जगतपुर गाउँमा विद्युत उपयाेग गर्ने करिब ८ सय ५० घरधुरी छन् । स्थानीय चौराहामा जडान गरिएको ट्रान्सफर्मर पड्किँदा चौराहाभन्दा पूर्वपट्टि गाउँमा विद्युत् सेवा अवरुद्ध छ ।
लामो समयसम्म गाउँमा विद्युत नआएपछि आफूहरु उज्यालाका लागि टर्च लाइट र मोबाइल चार्ज गर्न छिमेकी गाउँमा पुग्नुपर्ने बाध्यता बनेको स्थानीय मञ्जु न्यौपानेले बताए ।
लामो समयदेखि विद्युत् नभएपछि स्थानीयका घरमा रहेका मेशिनरी सामानसमेत बिग्रन थालेका छन् । ट्रान्सफर्मर पड्किँदा ३ लाख ५० हजार रुपैयाँ मर्मतमा खर्च भइसकेको र १५ दिनको अवधिमा पाँचपटक मर्मत गरी फेरबदलको काम गर्दा पनि समस्या समाधान नभएको सहकारीका सचिव गौरीकान्त न्यौपानेले बताए ।
“हामीले धेरै खर्च गर्न सक्ने अवस्था छैन”, उनले भने, “गाउँ अन्धकार भएपछि सुदूरपश्चिम प्रदेशका मुख्यमन्त्री कमलबहादुर शाहलाई भेटेर समस्या राखेका छौँ, सहयोग गर्छु भन्नुभएको छ ।”
