नेपाल पूर्वाधार 
काठमाडौं । लगानी बोर्ड नेपालले खप्तड एकिकृत पर्यटन परियोजनाको पूर्व सम्भाव्यता अध्ययन तथा गुरुयोजना तयार गर्नको लागि प्रस्ताव आव्हान गरेको छ । बोर्डले गत बुधबार (२५ माघ) मा एक सूचना जारी गर्दै प्रस्ताव माग गरेको हो ।
बोर्डले परियोजनाको पूर्व सम्भाव्यता अध्ययन र गुरुयोजना तयार गर्नको लागि देशभित्रैका परामर्शदातासँग आब्हान गरेको हो । यस कामको लागि इच्छुक फर्मले परियाजनाबारे थप जानकारी र आवश्यक डकुमेण्ट बोर्ड कार्यालयबाट निशुल्क उपलब्ध गराइने सूचनामा उल्लेख छ ।
एकल वा जभी (ज्वाइण्ट भेञ्चर) गरेर आवेदन दिन सकिनेछ । आवेदकले फागुन ११ गतेसम्ममा आवेदन दिइसक्नुपर्नेछ । तोकिएको समयभित्र परेका आवेदनको मूल्यांकन फर्म योग्यताको ४०, अनुभव ५० र क्षमता १० प्रतिशतले हुनेछ ।
परियोजनाको पूर्व सम्भाव्यता अध्ययनले परियोजना रहने ठाउँको पृष्ठभूमिबारे जानकारी हुनेछ । त्यस्तै, परियाजनाका विभिन्न पक्ष, लगानी, वातावरणीय र सामाजिक तथा कानून पक्षको विष्लेषण हुनेछ । यसबाहेक त्यस ठाउँमा परियोजना अघि बढाउदाका जोखिम, आयोजना कार्यान्वयनको ढाँचाबारे जानकारी हुनेछ ।
त्यस्तै, गुरुयोजना निर्माणबाट अवधारणागत योजना तयार गरिनेछ । सम्भावित सबै योजनाका पक्षलाई समेटिनेछ । यसबाहेक त्यस क्षेत्रमा दीगो पर्यटन विकास गर्नको लागि आवश्यक पर्यटन पूर्वाधारबारे खोजिनेछ ।
लगानी बोर्डले विशेषगरी खप्तड क्षेत्रमा पर्यटनको सम्भावना र प्रकृतिमा आधारित पर्यटन गन्तव्य विकास गर्नमा सहयोग पुग्ने जानकारी दिएको छ । यस आयोजनालाई भविष्यमा सार्वजनिक निजी साझेदारी ढाँचामा अघि बढाउने योजना छ ।
काठमाडौंमा २०७५ चैतमा आयोजना अन्तर्राष्ट्रिय लगानी सम्मेलनमा खप्तड एकिकृत पर्यटन परियोजना पनि सोकेमा राखिएको थियो । तर, लामो समयसम्म यो परियोजनामा प्रगति भएको थिएन ।
त्यस बेला खप्तड राष्ट्रिय निकुञ्जमा एकीकृत पयर्टन र यातायात पूर्वाधार निर्माणका लागि १८ करोड ७० लाख अमेरिकी डलर बराबर लागत अनुमान गरिएको थियो ।
