नेपाल पूर्वाधार 
काठमाडौं । भोटेकोशी र बुढीगण्डकी नदीमा आएको बाढीका कारण विभिन्न क्षेत्रमा क्षति पुगे पनि नेपालमा विदेशी पर्यटक आगमन बढेको छ। सन् २०२६ को सेप्टेम्बरमा ८८ हजार २४८ विदेशी पर्यटक नेपाल भित्रिएका छन्, जुन अघिल्लो वर्षको सोही महिनाको तुलनामा १२.१ प्रतिशतले बढी हो।
नेपाल पर्यटन बोर्डले अध्यागमन विभागको तथ्याङ्कका आधारमा सार्वजनिक गरेको विवरणअनुसार सन् २०२५ को सेप्टेम्बरमा ७८ हजार ७११ विदेशी पर्यटक नेपाल आएका थिए।
पर्यटक आगमनमा दक्षिण एसियाली र अन्य एसियाली मुलुकको योगदान उल्लेख्य देखिएको छ। सेप्टेम्बरमा सार्क राष्ट्रबाट ३० हजार ८५ पर्यटक नेपाल आएका छन्। यो कुल पर्यटक आगमनको ३४.०९ प्रतिशत हो। अघिल्लो वर्षको तुलनामा यस क्षेत्रबाट आउने पर्यटकको सङ्ख्या २३.९ प्रतिशतले बढेको छ।
सार्क राष्ट्रमध्ये भारतबाट सबैभन्दा बढी १७ हजार ४२५ पर्यटक आएका छन्। यो कुल आगमनको १९.७५ प्रतिशत हो। भारतबाट आउने पर्यटकको सङ्ख्या अघिल्लो वर्षको तुलनामा १२ प्रतिशतले बढेको छ। त्यस्तै, श्रीलङ्काबाट ७ हजार १०८ र बङ्गलादेशबाट ३ हजार ९६४ पर्यटक नेपाल आएका छन्। यी देशबाट आउने पर्यटकको सङ्ख्या क्रमशः ५४ प्रतिशत र ३१.५ प्रतिशतले बढेको छ।
अन्य एसियाली मुलुकबाट आउने पर्यटकको सङ्ख्यामा अझ बढी वृद्धि देखिएको छ। यस क्षेत्रबाट सेप्टेम्बरमा १९ हजार ८८८ पर्यटक नेपाल आएका छन्, जुन अघिल्लो वर्षको तुलनामा ५८ प्रतिशतले बढी हो। कुल पर्यटक आगमनमा यस क्षेत्रको हिस्सा २२.५४ प्रतिशत रहेको छ।
चीनबाट आउने पर्यटकको सङ्ख्या दोब्बरभन्दा बढी भएको छ। सन् २०२६ को सेप्टेम्बरमा चीनबाट ११ हजार २१२ पर्यटक नेपाल आएका छन्। सन् २०२५ को सोही महिनामा चीनबाट ५ हजार २३७ पर्यटक आएका थिए। यसअनुसार चिनियाँ पर्यटकको सङ्ख्या ११४.१ प्रतिशतले बढेको छ।
त्यस्तै, जापानबाट २ हजार ६६, मलेसियाबाट १ हजार ८७७ र दक्षिण कोरियाबाट १ हजार ४१२ पर्यटक नेपाल आएका छन्। जापान, मलेसिया र दक्षिण कोरियाबाट आउने पर्यटकको सङ्ख्या क्रमशः ४५.४ प्रतिशत, १२.२ प्रतिशत र ४.३ प्रतिशतले बढेको छ। यद्यपि, थाइल्यान्ड र भियतनामबाट आउने पर्यटकको सङ्ख्यामा भने अघिल्लो वर्षको तुलनामा करिब ११ प्रतिशत गिरावट आएको छ।
बाढी तथा अन्य प्राकृतिक विपत्तिका बाबजुद पर्यटक आगमनमा भएको वृद्धिले नेपालको पर्यटन क्षेत्रमा विदेशी पर्यटकको आकर्षण कायम रहेको देखाएको छ। काठमाडौं उपत्यकाका भक्तपुर दरबार स्क्वायरलगायतका पर्यटकीय क्षेत्रमा पनि विदेशी पर्यटकको चहलपहल देखिएको छ।
📸 तस्बिर स्रोत: नेपाल फोटो लाइब्रेरी
