नेपाल पूर्वाधार 
काठमाडौं। नेपाल टेलिकमले बाढी प्रभावित क्षेत्र र आसपासका सेवाग्राहीलाई उपलब्ध गराउँदै आएको निःशुल्क भ्वाइस कल, डाटा र एसएमएस सेवा अर्को व्यवस्था नभएसम्म निरन्तर उपलब्ध गराउने भएको छ।
यसअघि भदौ १४ गतेसम्मका लागि निःशुल्क भ्वाइस कल, प्रतिदिन २ जीबी डाटा र ५० ओटा एसएमएस सुविधा उपलब्ध गराइएको थियो। अब उक्त सुविधा थप समयका लागि निरन्तर रहने नेपाल टेलिकमले जनाएको छ।
कम्पनीले बाढी प्रभावित क्षेत्रका बासिन्दालाई आवश्यकता अनुसार निःशुल्क सेवा प्रयोग गर्न आग्रह गरेको छ। उद्धार तथा राहत कार्यका साथै प्रभावित नागरिकलाई आफन्तजनसँग सञ्चार सम्पर्क कायम गर्न सहज होस् भन्ने उद्देश्यले सुविधा निरन्तरता दिइएको हो।
बाढीका कारण नेपाल टेलिकमका विभिन्न भौतिक संरचनामा क्षति पुगे पनि दूरसञ्चार सेवा यथासम्भव नियमित राख्न तथा क्षतिग्रस्त संरचनाको मर्मत–सम्भार गर्न कम्पनीका प्राविधिक टोली निरन्तर परिचालित छन्।
कम्पनीका अनुसार अधिकांश संरचना सुचारु भइसकेका छन्। बाँकी संरचना पनि यथाशीघ्र सञ्चालनमा ल्याउन प्राविधिक टोली खटिरहेको छ।
नेपाल टेलिकमले विपद्को यस अवस्थामा आफ्नो सेवा प्रयोग गरी प्रभावित नागरिकलाई आफन्तजनसँग सञ्चार सम्पर्क कायम गर्न सहयोग पुग्ने विश्वास व्यक्त गरेको छ।
मेटा टाइटल: बाढी प्रभावित क्षेत्रमा नेपाल टेलिकमको निःशुल्क भ्वाइस, डाटा र एसएमएस सुविधा निरन्तर
