नेपाल पूर्वाधार 
रेसुङ्गा । स्थानीयवासीको आफ्नै सक्रियतामा गुल्मीमा पक्की पुलको निर्माण गरेका छन् । जिल्लाको मुसिकोट नगरपालिका–५ आँपचौरका स्थानीयवासीको पहलमा धार्मिक क्षेत्र कोटेश्वर मन्दिर र कोटेश्वर गुफामा पुग्नका लागि घैँटेआँप कोटेश्वर पुलको निर्माण गरिएकाे हाे ।
निर्माण सम्पन्न पुलकाे आइतबार उद्घाटन गरिएकाे छ । निर्माण सम्पन्न पुलको आँपचौरका सबैभन्दा ज्येष्ठ नागरिक ९६ वर्षीय दुर्गादत्त अर्यालले उद्घाटन गरे । उनले विदेशमा रहेर पनि जन्मभूमिको माया लागेर गरेका कामले आफू प्रसन्न भएको बताए ।
हाल रोजगारीको सिलसिलामा जापानमा रहेका आँपचौरका स्थानीयवासी किरण खरेलले अगुवाइ गरेपछि पुल निर्माण सम्भव भएकाे हाे । १३ मिटर लम्बाइ र २ मिटर चौडाइको पक्की पुल ७ लाख ६० हजार रुपैयाँ लागतमा निर्माण सम्पन्न गरिएकाे छ ।
खरेलसहित हाल रोजगारी र व्यवसायको सिलसिलामा युरोप पुगेका फणिन्द्र भण्डारी र देशविदेशमा रहेका आँपचौरवासीकाे आर्थिक सहयाेगले गाउँमा पक्की पुलको निर्माण सम्भव भएकाे स्थानीयवासी डिल्लीराज अर्यालले जानकारी दिए ।
मुसिकोट नगरपालिकाका प्रमुख जीवन खरेलले धार्मिक क्षेत्रमा जान वर्षायाममा भएको असहजता मेटाउने सबैलाई धन्यवाद व्यक्त गरे । “विदेशमा रहनुभएका आँपचौरवासीको सहयोग प्रशंसायोग्य छ”, उनले भने, “स्थानीयवासीको सक्रियता भएमा असम्भव भन्ने केही हुँदैन ।” पुल निर्माणका लागि जय जय कोटेश्वर समूहले अभियान नै चलाएको थियो ।
पक्की पुलले मुसिकोट नगरपालिका–५ र चन्द्रकोट गाउँपालिका–८ लाई जोडेको छ । दुई पाङ्ग्रे सवारी साधन र पैदल यात्रुलाई पक्की पुलले राहात दिएकाे छ । पुलका कारण कोटेश्वर क्षेत्रमा थप पर्यटक आकर्षित हुने अपेक्षा गरिएको छ ।
