नेपाल पूर्वाधार 
काठमाडौं । म्याग्दी जिल्लाको अन्नपूर्ण गाउँपालिकामा ४२ मेगावाटको मिस्ट्री खोला जलविद्युत आयोजना सफल निर्माण गरी सञ्चालनमा ल्याएको माउन्टेन इनर्जी नेपाल कम्पनीले १२ मेगावाटको मिस्ट्री खोला-२ जलविद्युत आयोजना निर्माण गर्ने भएको छ । अहिले सञ्चानमा रहेको मिस्ट्री खोलाको क्यासकेड आयोजनाकोरूपमा मिस्ट्री खोला–२ निर्माण गर्न लागिएको हो ।
आयोजनाको अध्ययन पूरा भइसकेको छ । आयोजनाको प्रारम्भिक वातावरणीय परीक्षण प्रतिवेदन पनि स्वीकृत भइसकेको छ । कम्पनीले आयोजनाको उत्पादन अनुमतिपत्र लिने प्रक्रिया पनि अन्तिम चरणमा पुगेको छ । विद्युत विकास विभागले कम्पनीलाई आयोजनाको उत्पादन अनुमतिपत्र दिन ३५ दिने सूचना सार्वजनिक गरेको छ ।
विभागले उत्पादन अनुमतिपत्र दिनुअघि आयोजना निर्माण तथा सञ्चालन गर्दा कुनै प्रतिकुल असर पर्ने अवस्था रहेमा त्यसबारे लिखित राय/सुझाव पेश गर्न सम्बन्धित सरोकारवालामा आग्रह गरेको छ ।
सरोकारवालाबाट आउने लिखित राय/सुझावको अध्ययनपछि आयोजनाको उत्पादन अनुमतिपत्र जारी गर्ने प्रक्रिया पूरा हुने विभागले जनाएको छ । नदीको बहावमा आधारित यो आयोजनामा मिस्ट्री खोलाबाट विद्युत उत्पादन भई निकास हुने पानीको उपयोग गरी विद्युत उत्पादन गरिनेछ । आयोजनामा घट्टे खोलाको पानी पनि मिसाइनेछ ।
आयोजनाको नेट हेड ७७.४३ मेगावाट रहने गरी डिजाइन गरिएको छ । २०८२ सालभित्र आयोजना निर्माण सम्पन्न गरी राष्ट्रिय प्रसारण प्रणालीमा जोड्ने लक्ष्य छ । नेपाल विद्युत प्राधिकरणसँग आयोजनाको विद्युत खरिद सम्झौता (पिपिए) भएपछि संरचना निर्माणको काम सुरु गरिने प्रवद्र्धक कम्पनीले जनाएको छ ।
आयोजना निर्माण सम्पन्न भई सञ्चालनमा आउँदा वार्षिक ६७.५२ गिगावाट गर्न विद्युत उत्पादन हुनेछ । विद्युतगृहमा ६ मेगावाट क्षमताका २ वटा उत्पादन युनिट राखिनेछ । आयोजनाले उत्पादन गर्ने विद्युत कालीगण्की कोरिडोर प्रसारण लाइनको दाना सबस्टेसनमार्फत राष्ट्रिय प्रणालीमा जोडिनेछ ।
दाना सबस्टेसनसम्म विद्युत पुर्याउने १३२ केभी प्रसारण लाइन पहिले नै बनिसकेको छ । मिस्ट्री-२ को विद्युतगृहदेखि मिस्ट्री खोलाको स्वीचयार्डसम्म करिब ३ किलोमिटर १३२ केभी सिंगल सर्किट प्रसारण लाइन निर्माण गरे पुग्नेछ ।
मिस्ट्री खोलाको क्यासकेड आयोजना भएकाले मिस्ट्री खोला-२ मा बाँध निर्माण गर्नु नपर्दा निर्धारण हुने लागत र समयभित्र सम्पन्न गर्न सकिने कम्पनीले जनाएको छ ।
