नेपाल पूर्वाधार 
काठमाडौं । रसुवामा निर्माणाधीन १११ मेगावाटको रसुवागढी जलविद्युत आयोजनाको विद्युत चालू आर्थिक वर्षभित्र राष्ट्रिय प्रसारण प्रणालीमा जोड्न काम भइरहेको छ । लक्ष्यभन्दा धेरै ढिलो भइसकेको आयोजना चालू वर्षमा सञ्चालनमा ल्याउन अन्तिम चरणको काम भइरहेको हो ।
आयोजनाको ९० प्रतिशत निर्माण सम्पन्न भइसकेको प्रवर्द्धक रसुवागढी हाइड्रोपावर कम्पनीका प्रमुख कार्यकारी अधिकृत छवि गैरेले बताए । उनका अनुसार अहिले आयोजनामा हाइड्रो तथा इलेक्ट्रोमेकानिकल उपकरण जडानको काम धमाधम भइरहेको छ ।
‘विविध कारणले आयोजना प्रभावित हुँदा हामी लक्ष्यभन्दा धेरै पछाडि भइसकेका छौं,’ उनले भने, ‘तर, अब यो भन्दा ढिलो हुँदैन । बाँकी १० प्रतिशत काम सम्पन्न गरेरै यसै वर्ष प्रसारण प्रणालीमा आयोजनाकाे विद्युत जोड्छौं ।’
सिभिलतर्फ मुख्य सुरुङमा ग्राउटिङको अन्तिम चरणको काम भइरहेको पनि उनले बताए । पहिरोको समस्याका कारण आयोजनाको सर्जसाफ्ट निर्माणमा सुरुवादेखि नै समस्या हुँदै आएको थियो । पहिरोले सर्जसाफ्ट पुग्ने पहुँच सडकमा क्षति पुर्यापछि सुरुङको बाटोबाट निर्माण सामाग्री पुर्याएर काम गर्दै आएको गैरेले जानकारी दिए ।
कमजोर भौगोलिक अवस्थाका कारण आयोजनाको टेलरेस (निकास) सुरुङ निर्माणमा पनि ढिलाइ हुँदै आएकोमा अहिले काम भइरहेको छ । अबको ६ महिनाभित्रमा सिभिल, हाइड्रो तथा इलेक्ट्रोमेकानिकलतर्फको सबै काम सम्पन्न गरिसक्ने पछिल्लो तालिका रहेको उनले बताए । आयोजनाकाे संरचना तयार भएपछि उपकरण तथा संरचनाकाे परीक्षण सुरु हुनेछ ।
प्रसारण लाइनको काम अब रोयल कन्स्ट्रक्सनले गर्ने
आयोजनाको विद्युत चिलिमे हब सबस्टेसनसम्म ल्याइपुर्याउने १३२ केभी प्रसारण लाइन बाँकी काम रोयल कन्स्ट्रक्सन कम्पनीले गर्ने भएको छ । प्रसारण लाइनको ठेक्का पाएको मुडभरी एण्ड जोशी कन्स्ट्रक्सनले काम नगरेपछि ठेक्का सम्झौता अन्त्य गरी बाँकी काम सम्पन्न गर्न रोयल कन्स्ट्रक्सनसँग सम्झौता गरी परिचालन गरिएको हो ।
मुडभरी एण्ड जोशीसँगको ठेक्का सम्झौता अनत्य गरी रोयल कन्स्ट्रक्सनसँग गत कात्तिक १५ गते ठेक्का सम्झौता गरेको गैरेले जानकारी दिए । उनका अनुसार अब नयाँ ठेकेदार कम्पनीले ठेक्का सम्झौता भएको मितिले ६ महिनाभित्रमा प्रसारण लाइनको काम सम्पन्न गर्नुपर्नेछ ।
‘हामीले पटक-पटक ताकेता गर्दा पनि मुडभरी एण्ड जोशीले प्रसारण लाइनको काम पूरा गर्न अटेर गर्यो । उसँगको सम्झौता नै अन्त्य गरेर बाँकी कामको जिम्मा नयाँ कम्पनीलाई दिएका छौं’ उनले भने ।
आयोजनाको विद्युतगृहदेखि चिलिमे हब सबस्टेसनसम्म १३२ केभी १० किलोमिटर प्रसारण लाइन प्रवद्र्धक कम्पनीले निर्माण गर्नुपर्नेछ । अहिलेसम्म प्रसारण लाइनको रुटमा पर्ने ३२ वटा टावरमध्ये २७ वटाको जग खन्ने काम सकिएको छ । बाँकी काम नयाँ ठेकेदार कम्पनीले पूरा गर्नेछ ।
प्रसारण लाइन पूरा हुने अवधिसम्ममा आयोजनाको सबै काम सम्पन्न गरेर विद्युत उत्पादन सुरु गर्न सकिने गैरेले बताए । रसुवागढी आयोजना अबको ६ महिनाभित्र सञ्चालनमा ल्याउन तालिका अनुसार काम भइरहे पनि विद्युत प्रवाह हुने २२० केभी चिलिमे-त्रिशूली प्रसारण लाइन तयार नहुँदासम्म सम्भव हुने छैन ।
विद्युत प्राधिकरणले पनि चैतसम्ममा प्रसारण लाइन तयार गर्ने तालिका अनुसार काम गरिरहेको छ । भौगोलिक विकटता तथा ठेकेदार कम्पनीको असक्षमताका कारण चिलिमे-त्रिशूली प्रसारण लाइनको कामले तीव्रता पाउन सकेको छैन ।
