नेपाल पूर्वाधार 
काठमाडाैं । नर्वेजियन एजेन्सी फर डेभलपमेन्ट कोअपरेसन,नोराडका महानिर्देशक बर्ड भेगर सोल्जेलले काठमाडौं विश्वविद्यालय (केयु) को भ्रमण गरेका छन् । साेमबार नेपालका लागि नर्वेजियन राजदूत ताेरुण ड्रामडलसँगै नर्वेजियन पदाधिकारी लिएर धुलिखेल पुगेका उनले केयुकाे स्थलगत भ्रमण गरेका हुन् ।
उनीसहितकाे नर्वेजियन प्रतिनिधिहरूलाई केयुकाे स्कुल अफ इन्जिनियरिङका डीनले स्वागत गरे । प्रतिनिधिहरूले नर्वेजियन प्रोफेसरको सम्मानमा नामकरण गरिएको इङ्ग जोहानेसेन ब्लक र टर्बाइन परीक्षण प्रयोगशालाको अवलाेकन समेत गरेकाे केयुले जनाएकाे छ ।
धुलिखेलको छोटो भ्रमणपछि नर्वेजियन प्रतिनिधिहरू बालकुमारीस्थित केयुकाे स्कुल अफ म्यानेजमेन्टमा पुगे । उनीहरूलाई त्यहाँ केयुका उपकुलपति उपकुलपति प्राध्यापक डा। भोला थापाले स्वागत गरेका थिए ।
केयुका रजिष्ट्रार प्राध्यापक डा. अच्युत वाग्लेले कार्यक्रममा स्वागत मन्तव्य राखे । सहायक प्राध्यापक डा. विराजसिंह थापाले प्रारम्भिक चरणदेखि केयू र नर्वेबीचको सहकार्यबारे संक्षिप्त प्रस्तुति दिएकाे केयुले जनाएकाे छ ।
महानिर्देशक बर्द भेगर सोल्जेलले केयुले गरिरहेकाे कामको प्रशंसा गर्दै आफ्नो धारणा राखेका थिए । राजदूत तोरुण ड्रामडलले पनि नर्वे र नेपालबीच वर्षाैंदेखि सहकार्य हुँदै आएको बताइन् । उपकुलपति थापाले नर्वे र केयूबीचको यो सम्बन्ध भविश्यमा अझ प्रभावकारी र फलदायी ढंगले अगाडि बढ्ने विश्वास व्यक्त गरे ।
इनर्जी नेपालले आयोजना तथा समन्वय गरेको उक्त कार्यक्रममा केयूका पदाधिकारी, संकाय सदस्य, आयोजना प्रमुख तथा कर्मचारीहरू पनि सहभागिता रहेको थियो ।
