नेपाल पूर्वाधार 
काठमाडौं । पूर्व पश्चिम विद्युतीय रेलमार्ग अन्तर्गत काकडभिट्टादेखि इनरुवासम्मको १०६ किलोमिटर ट्र्याक बेड (लिक राख्नुअधिको काम) निर्माणको लागि जग्गा प्राप्तिका काम ठप्प भएको छ । त्यस खण्डमा ट्र्याक निर्माणको लागि ६ सय ५ हेक्टर जग्गा अधिग्रहन गर्नुपर्नेछ । तर, जग्गा अधिग्रहनको लागि बजेटको अभाव हुँदा काम टप्प हुन पुगेको हो ।
रेल विभागले अधिग्रहनमा पर्ने घर जग्गा रोक्का राखिसकेको छ । विभागका महानिर्देशक दीपक कुमार भट्टराईका अनुसार मुआब्जा निर्धारणको लागि पूर्व तयारीको काम समेत सकिएको छ । तर बजेटको अभावले गर्दा मुआब्जा निर्धारण र थप काम गर्न नसकेको जानकारी दिए ।
विभागका अनुसार आवश्यक जग्गा प्राप्त गर्नको लागि २५ अर्ब रुपैयाँ आावश्यक पर्ने देखिएको छ । तर, विभागसँग जग्गा प्राप्त भनेर उपलब्ध रकम १ अर्ब ६३ करोड रुपैयाँ मात्र रहेको महानिर्देशक भट्टराईले जानकारी दिए । विभागले पटक पटक भौतिक पूर्वाधार तथा यातायात, अर्थ मन्त्रालयमा बजेट दिने सुनिश्चितता गर्न लेखी पठाएको छ । ‘बजेटको सुनिश्चितता नभइ काम थाल्न सकिएन’ मंगलबार संसदको विकास तथा प्रविधि समितिमा भने ।
आगामी आर्थिक वर्षको लागि पनि सरकारले रेल तथा मेट्रोरेल आयोजनाको लागि ६ अर्ब ५३ करोड रुपैयाँ विनियोजन गरेको छ । त्यो सबै रकम काकडभिट्टादेखि इनरुवासम्मको जग्गा प्राप्तिको लागि प्रयोग गर्ने हो भने पनि अपुग हुने अवस्था छ ।
