नेपाल पूर्वाधार 
काठमाडौ । सामान्यतया गर्मी बढेसँगै सिन्धुपाल्चोकको सुकुटे क्षेत्रस्थित तल्लो भोटेकोसी (सुनकोसी) नदीमा जलयात्रा अर्थात् राफ्टिङका लागि आन्तरिक पर्यटकको चाप बढ्ने गर्छ। गर्मी छल्न र नदीसँग रमाउँदै बिदा मनाउन उपत्यकाबासीका लागि सुकुटे प्रमुख गन्तव्य मानिन्छ। प्रायः फागुनको मध्यदेखि असार–साउनको मध्यसम्म यहाँ राफ्टिङ हुने गर्दछ।
तर यस वर्ष माघ महिनाको कठ्याङ्ग्रिने चिसोमा पनि भोटेकोसी नदीमा साहसिक राफ्टिङ देखिएको छ। सामान्यतया सुनसान रहने हिउँदको मौसममा समेत साहसको खोजीमा नदीमा पौँठेजोरी खेलिरहेका दृश्यहरू कैद भएका छन्।
भोटेकोसीको छालले डुंगामाथि हान्दा उछिट्टिएको चिसो पानी अनुहारमा पर्दा शरीर सिहरिन्छ, तर सहभागीहरूको आँखामा डरभन्दा ठूलो उत्साह देखिन्छ। हिउँदमा नदीको बहाव कम भए पनि पानी अत्यन्त चिसो हुने भएकाले यो समय राफ्टिङ अझ चुनौतीपूर्ण मानिन्छ।
राफ्टिङ स्टारका सञ्चालक दीपक कुमार राईका अनुसार अनुभवी गाइडको निर्देशन, पर्याप्त सुरक्षा उपकरण र टोलीगत समन्वय बिना यस्तो साहस सम्भव हुँदैन। “चिसो मौसम र उग्र नदीसँग जुध्न आत्मविश्वास र अनुशासन अत्यावश्यक हुन्छ,” उनले भने।
चिसो मौसम, उग्र नदी र मानवीय जिद्दीताको संगमले हिउँदको राफ्टिङलाई फरक कथामा रूपान्तरण गरेको छ, जहाँ साहसले मौसमलाई जित्ने प्रयास गर्दछ। हिउँदको भोटेकोसीमा राफ्टिङ दृश्य मात्र होइन, अनुभूति पनि हो चिसो पानी, तेज बहाव र आत्मविश्वासले साहसिक पर्यटनको अर्को पाटो उजागर गरेको छ।
तस्बिरहरू : नेपाल फोटो लाइब्रेरी
