नेपाल पूर्वाधार 
काठमाडौं । नेपालमा डङफेङ ब्रान्ड तथा कामा ब्रान्डका विद्युतीय गाडीहरु बिक्री गर्ने त्रिवेणी मेटोकर्प प्रालिले एक वर्षमा १३ करोड ४० लाख रुपैयाँको व्यापार गरेको छ ।
नेपालको व्यापारिक समूह त्रिवेणी ग्रुपअन्तर्गतको यो कम्पनी सन् २०२३ मा खुलेको थियो । यो कम्पनीले नेपालमा डङफेङ ब्रान्डका गाडी र स्पेयर पार्टस्का साथै कामा ईभी र माइक्रोबसहरुको बिक्री गर्दै आएको छ । २०२४ को मध्य अप्रिलबाट व्यवसायिक सञ्चालनमा आएको कम्पनीले एक वर्षमा १३ करोड ४० लाख रुपैयाँको व्यापार गरेको हो ।
यो अवधिमा कम्पनीको पिबिआइएलडीटी मार्जिन (ब्याज, लिज, मूल्यह्रास र कर तिर्नु अघि को नाफा) भने ५.१५ प्रतिशत कायम भएको छ ।
हालका लागि कम्पनीले ७० करोड रुपैयाँको कर्जा सुविधाका लागि रेटिङ गराएको छ । रेटिङ एजेन्सी केयर रेटिङ नेपालले कम्पनीलाई ५ करोड रुपैयाँको दीर्घकालिन कर्जा सुविधाका लागि डबल बि र ६५ करोड रुपैयाँ अल्पकालिन कर्जा सुविधाका लागि ए फोर रेटिङ दिएको छ ।
