नेपाल पूर्वाधार 
कपिलवस्तु । नेपाल विद्युत् प्राधिकरणकाे कृष्णनगर वितरण केन्द्रले आर्थिक वर्ष २०८०/८१ मा १ अर्ब २८ करोड ७९ लाख ५१ हजार ७ सय ९२ रुपैयाँ राजस्व सङ्कलन गरेको छ । वितरण केन्द्रका प्रमुख सुशील पौडेलका अनुसार गत आवको तुलनामा ३७.८६ प्रतिशत बढी राजस्व सङ्कलन भएकाे हो ।
“आव २०७९/८० मा कृष्णनगर वितरण केन्द्रले ९३ करोड ४२ लाख २३ हजार ८ सय ५१ रुपैयाँ राजश्व संकलन भएकाे थियाे । गएकाे आर्थिक वर्षमा विद्युत खपत बढेकाले राजश्व अझै बढेकाे छ,”उनले भने ।
गत आवमा विद्युत् प्राधिकरण कृष्णनगर वितरण केन्द्रमार्फत १३ करोड ९३ लाख ७३ हजार ५ सय ३७ युनिट विद्युत खपत भएको केन्द्र प्रमुख पौडेलले जानकारी दिए । आव ०७९/८० मा ९ करोड ९२ लाख ४३ हजार २ सय ८६ युनिट विद्युत खपत भएको थियो । गतवर्षको तुलनामा ४०.०५ प्रतिशत खपत वृद्धि भएको वितरण केन्द्रले जनाएको छ ।
प्राधिकरणले ४५ दिनको लक्ष्य लिए पनि ४१ दिनमा लक्ष्य अनुसार राजस्व सङ्कलन गर्न सफल भएको हो । हुकिङमार्फत विद्युत् चोरी गर्ने ५४ जनालाई कारबाही गरी ८ लाख १९ हजार ७ सय २२ रुपैयाँ सङ्कलन गरेको छ ।
कालोसूचीमा परेका ६१ ग्राहकबाट ४७ लाख ७९ हजार ९६ रुपैयाँ, मिटरबाट सिधा विद्युत् चोरी गर्ने १० जनामार्फत २ लाख ४४ हजार ४ सय ४१ रुपैयाँ जरिवाना रकम लिइएको प्राधिकरणले जनाएको छ ।
प्राधिकरणले ‘डिमान्ड’ चुहावटमा परेका ८२ जनामार्फत ३ लाख ३ हजार ९ सय ५३ रुपैयाँ, बन्दी मिटरबाट ४ लाख २९ हजार ४ सय ७५ रुपैया असुल गरेको छ । विद्युत् महसुल शुल्क नतिरेका २ हजार ३ सय ४९ जनामार्फत ६ करोड ७५ लाख ८ सय ३३ रुपैयाँ सङ्कलन गरेको हो ।
केन्द्रले सडक बत्तीको ७ करोड ४ लाख ३७ हजार ९ सय ८३ रुपैयाँ बक्यौता रहेको जनाएको छ । सरकारी अनुदान बक्यौता ६ करोड ६ लाख ३३ हजार १ ७७ रुपैयाँ छ ।
वितरण केन्द्रले कपिलवस्तुको चोरखोला गाउँमा ६२ वर्षपछि विद्युतीकरण गरी गाउँमा बत्ती बालेको छ । आव २०८०/८१ मा कृष्णननगर मातहत सञ्चालित विभिन्न १३ योजनामध्ये ८ वटा सम्पन्न भएका छन् । बाँकी ५ वटा योजना सञ्चालनको चरणमा छन् । कृष्णनगर वितरण केन्द्र मातहत कूल ५० हजार ५ सय ८१ ग्राहक छन् ।
