नेपाल पूर्वाधार 
काठमाडौं । शहरी विकास मन्त्री सीता गुरुङले कर्मचारीहरुलाई परिणाममुखी काम गर्न निर्देशन दिएकी छन् । आयोजनामा रहेको समस्या समाधान गर्न आफू प्रतिबद्ध रहको बताउदै उनले परिणाम आउने गरी काम गर्न निर्देशन दिएकी हुन्।
शहरी विकास मन्त्रालय, शहरी विकास तथा भवन निर्माण विभागको २०७९/०८० को वार्षिक प्रगति समिक्षा तथा आर्थिक वर्ष २०८०/०८१ को वर्षिक कार्यक्रम कार्यान्वयन सम्बन्धी गोष्ठिलाई शुक्रवार सम्बोधन गर्दै मन्त्री गुरुङले मनदेखि नै काम गर्न आयोजनाका प्रमुखहरुलाई निर्देशन दिइन् ।
‘समस्या छ भनेर मात्र होइन, समाधान गर्ने गरी अघि बढनुहोस, मन्त्रालयले गर्नुपर्ने निर्णय समयमा नै गरेर अघि बढछ’ उनले भनिन् । आयोजना, विभाग र मन्त्रालयको समन्वयको कामलाई प्रभावकारी रुपमा अघि बढाइने प्रतिबद्धता जनाउदै उनले अन्तरमन्त्रालयको समन्वयको कामलाई पनि उच्च प्राथमिकता दिइने बताइन् ।
मन्त्रालयले गत आर्थिक वर्षमा अपेक्षा अनुसार पुँजीगत खर्च गर्न नसकेको बताउदै मन्त्री गुरुङले यस आर्थिक वर्षमा लक्ष्य अनुसारको पुँजीगत खर्च बढाउनको लागि आयोजनाका प्रमुखहरुलाई निर्देशन दिइन् । कार्यक्रममा शहरी विकास मन्त्रालयका सचिव रविन्द्रनाथ श्रेष्ठले रुग्न आयोजनाहरुमा अब धेरै अलमलिन नहुने बताउदै काम नगर्ने निर्माण व्यवसायीहरुसँग ठेक्का तोडेर अघि बढन निर्देशन दिए ।
‘पुँजीगत खर्च बढाउन ध्यान दिनुपर्छ, अहिलेको पुँजीगत खर्च सन्तोषजनक छैन, यस आर्थिक वर्षमा लक्ष्य अनुसारको खर्च गर्न समयमा नै काम अघि बढाउनुहोस्’ उनले भने । शहरी विकास तथा भवन निर्माण विभागले गत आर्थिक वर्षमा ३८ अर्ब ९५ करोड ७९ लाख ४ हजार विनियोजन भएकोमा ५९ प्रतिशत वित्तिय र ६५ प्रतिशत भौतिक प्रगति हासिल गरेको छ । यस आर्थिक वर्षमा विभागको लागि २९ अर्ब ५७ करोड रुपैयाँ विनियोजन गरेको छ ।
