नेपाल पूर्वाधार 
सोलुखुम्बु । सोलुखुम्बुमा सडक कालोपत्रेका लागि टेण्डर आह्वान गरिएको छ ।
सोलुखुम्बुको तल्लो क्षेत्रबाट खुम्बु क्षेत्र जोड्ने सडक कालोपत्रेका लागि ६० करोड बराबरको टेण्डर आह्वान गरिएको हो।
जिल्लाको माप्यदुधकोशी गाउँपालिकाबाट खुम्बु पासाङ लहामु गाउँपालिका जोड्ने सडकका लागि निर्वाचन क्षेत्र रणनीतिक सडक कार्यक्रमअन्तरगतको परियोजनाका लागि बुधबार टेण्डर आह्वान भएको हो।
जिल्लाको पर्यटन विकासका लागि तल्लो सोलुलाई सगरमाथा क्षेत्रमा पर्ने खुम्बुसम्म सडक सञ्जालले जोड्ने उद्देश्यका साथ तत्कालिन संघीय सांसद हेमकुमार राई ‘शूरवीर’ले २०७६ साल फाल्गुन २५ गतेको दिन सल्लेरी–सिलगुडीडाडाँ–काँकु–बासा–ओर्लाङ्गघाट–जुभिङ–खरिखोला–लुक्ला चौरीखर्क सडक खण्ड कालोपत्रेलाई निर्वाचन क्षेत्र रणनीतिक सडक कार्यक्रममा समावेश गर्न भौतिक पूर्वाधार मन्त्रालयमा सिफारिस गरेका थिए।
सोही सिफारिसको आधारमा छनोट भएको उक्त सडक कालोपत्रेका लागि टेण्डर प्रक्रिया अघिल्लो वर्ष नै अघि बढ्नुपर्ने भएपनि प्राविधिक कारणले रोकिएको थियो।
