Nepal Purbadhar

बिहिबार, माघ १९, २०७९
Thursday, February 2, 2023

बिहिबार, माघ १९, २०७९
Thursday, February 2, 2023

अमरपुर-ढुंगेसाँघु र गोदक-सोयाक प्रसारण लाइन निर्माण हुने

132 KV Transmission Line

काठमाडौं । नेपाल विद्युत प्राधिकरणले काबेली र कोसी कोरिडोरलाई जोड्न २ प्रसारण लाइन आयोजना निर्माण गर्ने भएको छ । प्राधिकरणले ताप्लेजुङ, पाँचथर र इलाममा संरचना रहने गरी अमरपुर-ढुंगेसाँघु र गोदक-सोयाक १३२ केभी डबल सर्किट प्रसारण लाइन आयोजना निर्माण गर्न लागेको हो ।

प्राधिकरणले यी प्रसारण लाइन आयोजना निर्माणको अनुमतिका लागि विद्युत विकास विभागमा आवेदन दिएको छ । सबै प्रक्रिया पुर्याएर आवेदन आएकाले प्राधिकरणलाई अनुमतिपत्र दिने तयारी विभागले गरेको छ ।

विभागले यी प्रसारण लाइन आयोजनाको अनुमतिपत्र दिनुअघि ३५ दिने सूचना जारी गरी सम्बन्धित सरोकारवालासँग लिखित राय तथा सुझाव मागेको छ । विभागका अनुसार सम्बन्धित सरोकारवालाले प्रसारण लाइन आयोजना निर्माण गर्दा कुनै प्रकारको प्रतिकुल प्रभाव पर्न सक्ने अवस्था देखिएमा अबको ३५ दिनभित्र प्राप्त हुने गरी लिखित राय तथा सुझाव पठाउनु पर्नेछ ।

अमरपुर–ढुंगेसाँघु प्रसारण लाइन पाँचथरको हलिहाङ गाउँपालिकास्थित प्राधिकरणको काबेली कोरिडोर प्रसारण लाइन अन्तर्गत निर्माण भएको अमरपुर सबस्टेसनदेखि ताप्लेजुङको मेवाखोला गाउँपालिकास्थित कोसी कोरिडोर प्रसारण लाइनको २२०/१३२ केभी ढुंगेसाँघु सबस्टेसनसम्म निर्माण गरिनेछ ।

यो प्रसारण लाइन २० किलोमिटर लामो हुनेछ । यो प्रसारण लाइन निर्माण हुँदा २ सय मेगावाट विद्युत प्रवाह गर्न सकिने अध्ययनले देखाएको छ । प्रसारण लाइनको रुटमा ७३ वटा टावर निर्माण हुनेछन् ।

प्रसारण लाइन निर्माणका लागि कूल ३४.४३ हेक्टर जग्गा अधिग्रहण गर्नुपर्नेछ । जसमा प्रसारण लाइनको टावर फाउन्डेसनका लागि मात्र ०.७३ हेक्टर जग्गा आवश्यक पर्ने देखिन्छ । बाँकी ३३.७० हेक्टर जग्गा प्रसारण लाइनको तारमुनिको जग्गा हुनेछ ।

प्राधिकरणले निर्माण सुरु गरेको ३२ महिनाभित्र यो प्रसारण लाइन आयोजनाको काम सम्पन्न गर्नुपर्ने तालिका विभागले दिएको छ । यो प्रसारण लाइन निर्माण हुँदा काबेली र कोसी कोरिडोर एक आपसमा जोडिन गई प्रसारण सञ्चालन तयार हुनेछ ।

यस्तै, गोदक–सोयाक प्रसारण लाइन इलाम नगरपालिका–१० स्थित काबेली कोरिडोरको गोदक सबस्टेसनदेखि सोही नगरपालिका–११ को सोयाकसम्म निर्माण हुनेछ । यो प्रसारण लाइन करिब ६.५६ किलोमिटर लामो हुने अध्ययनले देखाएको छ ।

यो प्रसारण लाइन निर्माण हुँदा पनि २ सय मेगावाट विद्युत प्रवाह गर्न सकिनेछ । प्रसारण लाइनको रुटमा २६ वटा टावर निर्माण हुनेछन् । यो प्रसारण लाइन आयोजनाका लागि १३.०५ हेक्टर जग्गा आवश्यक पर्नेछ ।

प्राधिकरणले निर्माण सुरु भएको २८ महिनाभित्रमा यो प्रसारण लाइन सम्पन्न गरी सञ्चालनमा ल्याउनु पर्नेछ । यी प्रसारण लाइन निर्माण हुँदा प्रदेश–१ का पहाडी जिल्लामा निर्माण हुने जलविद्युत आयोजनाको विद्युत प्रवाह गर्ने पूर्वाधार तयार हुनेछ ।


Read Previous

खानेपानी र सरसफाई सुधारका लागि विश्व बैंकले १० अर्ब रुपैयाँ ऋण सहयोग गर्ने

Read Next

वितरण केन्द्र स्थापनापछि सुनापति क्षेत्रका ५ हजार ग्राहकलाई सुविधा

Leave a Reply

Your email address will not be published.