नेपाल पूर्वाधार 
काठमाडौं । राजधानीको भृकुटीमण्डपमा सुरु भएको चौंथो संस्करणको हिमालयन हाइड्र एक्स्पो २०२४ को औपचारिक उद्घाटन बिहीबार हुने भएको छ । बुधबारबाटै एक्स्पोको शुभारम्भ भइसकेको भएपनि राष्ट्रपति रामचन्द्र पौडेलले बिहीबार मात्रै औपचारिक उद्घाटन गर्ने भएका हुन् ।
राष्ट्रपति पौडेलको कार्य व्यस्थताका कारण दोस्रो दिनका लागि औपचारिक उद्घाटन सत्र राखिएको आयोजक स्वतन्त्र ऊर्जा उत्पादकहरूको संस्था,नेपाल (इपान) का अध्यक्ष गणेश कार्कीले बताए ।
इपान महासचिव बलराम खतिवडाले एक्पोको पहिलो दिन सर्वसाधारणको राम्रो सहभागिता देखिएको बताए । उनले ३ दिनसम्म चल्ने एक्स्पोमा ५० हजार बढीले अवलोकन गर्ने लक्ष्इ राखिएको बताए ।
एक्स्पोको पहिलो दिन ३ वटा प्राविधिक सत्रहरू सम्पन्न भएका छन् । एक्स्पोमा राखिएका स्टलहरूमा दर्शकको घुईंचो लागेको छ । एक्स्पोमा १२ देशका १ सय भन्दा बढी स्टलहरू राखिएको छ ।
विशेष गरी काठमाडौं विश्व विद्यालयको ग्रीन हाइड्रोजन स्टलमा अवलोकनकर्ताको भीड लागेको छ । जलविद्युत आयोजना निर्माणमा उपयोग हुने उपकरण, ठूला मेसिनका स्टलमा पनि प्रवद्र्धक तथा अवलोकनकर्ताको भीड लागेको छ । बुधबारबाट सुरु भएकाे एक्स्पाे शुक्रबार सकिनेछ ।
