नेपाल पूर्वाधार 
काठमाडौं । नबिल बैंकले नेपालमा लगानी गर्न खोजिरहेका विदेशी लगानीकर्ताका लागि सहजीकरण तथा प्रवर्द्धन गर्न लगानी बोर्डसँग समझदारी गरेको छ । बैंकले लगानी ल्याउन इच्छुक विदेशीलाई वित्तीय सल्लाह एवं सेवा दिन तथा नेपालमा लगानीका अवसरहरू देखाउन बोर्डको कार्यालयसँग समझदारी गरेको हो ।
समझदारीमा बैंकका प्रमुख कार्यकारी अधिकृत अनिल केशरी शाह र लगानी बोर्ड नेपालका प्रमुख कार्यकारी अधिकृत सुशील भट्टले हस्ताक्षर गरेका छन् ।
समझदारीअनुसार विदेशी लगानीकर्ताका लागि नेपालमा लगानी गर्न प्रोत्साहन गर्न बैंक र बोर्डबीच सहकार्य हुनेछ । साथै, प्रत्यक्ष वैदेशिक लगानी प्रवर्द्धन गर्न तथा प्रवर्द्धनात्मक कार्यक्रममा सहभागिताका लागि पनि बोर्डसँग सहकार्य हुने बैंकले जनाएको छ ।
नेपालको अग्र स्थानको बैंकले पुर्वाधार विकासमा विगत ३७ बर्ष देखि नै योगदान गर्दै आईरहेको छ । लगानी बोर्डको कार्यालयले पनि विगत १० बर्षदेखि नै सकृयता देखाउँदै आएको छ । जसलाई सरकारले पनि अवसरको रूपमा प्रवर्द्धन गर्दै आइरहेको छ ।
बोर्डसँग भएको समझदारीले विदेशी लगानीकर्ताहरूलाई आकर्षित गरी देशको आर्थिक विकासलाई संयुक्त रूपमा प्रवर्द्धन गर्ने र पूर्वाधार परियोजनाहरू, हरित क्षेत्रका अवसरहरू, ऊर्जा क्षेत्रको प्रवर्द्धन तथा अन्य पुर्वाधार सम्बन्धि कुराहरू विकास गर्न देशमा दिगो स्रोतको खाडललाई पुरा गर्न टेवा पुग्ने बैंकले जनाएको छ ।
विदेशी लगानी भित्र्याउनका लागि बैंकको महत्त्पूर्ण भूमिका रहेका कारण लगानी बोर्ड नेपालको कार्यालयले पहिलो पटक नबिल बैंकलाई साझेदार बनाएकाे भट्टले बताए । त्यसैगरी, बैंकका अध्यक्ष उपेन्द्र पौडेलले नबिल बैंकले दिगो बैंकिङसँगै दिगो देश बनाउनमा पनि ध्यान दिएको बताए ।
लगानी बोर्ड नेपाल जस्तो संस्थासँग जोडिन पाउँदा गौरब लागेको बैंकका प्रमुख कार्यकारी अधिकृत शाहले बताए । बैंकले सन् १९८४ देखि आफ्ना ग्राहकलाई समायनुकुल सेवा प्रदान गर्दै आएको छ । बैंकको देशभरमा १ सय ५० शाखा, १ सय ८७ एटिएम र १ हजार ५ सय भन्दा बढी रेमिट एजेन्टहरू छन् । बैंकले नेपाली बैंकिङ्ग क्षेत्रमा नविनतम् सेवाको सुरुवात गर्न अग्रणी भूमिका खेल्दै आइरहेको छ ।
