नेपाल पूर्वाधार 
काठमाडौं। मुग्लिन-पोखरा सडक आयोजनाको पश्चिम खण्डमा कालोपत्र गर्न सुरु गरिएको छ । कास्की र तनहुँको सीमा पर्ने कोत्रेदेखि पोखराको पृथ्वीचोकस्थित सेती पुलसम्मको १९ किलामिटर सडकमध्ये अहिले लामेआहालबाट अस्पाल्टसम्मको खण्डमा कालोपत्र गर्न सुरु गरिएको हो ।
पोखरा–३२ लामेआहालबाट अस्पाल्ट कालोपत्रको काम सुरु गरिएको आयोजना कार्यालयका सूचना अधिकारी इञ्जिनियर नारायण पौडेलले जानकारी दिए । उनका अनुसार यो खण्डमा सुरुवाती चरणमा ७ सय मिटर सडक कालोपत्र गर्ने तयारी छ । उनले बेस तयार भएका स्थानमा पनि क्रमशः कालोपत्र गर्दै जाने बताए ।
“अहिले बेस तयार भएको ठाउँमा कालोपत्र गर्न थालिएको छ । अरु ठाउँमा सडक सम्माउने काम भइरहेको छ । बेस तयार भएसँगै अन्य ठाउँमा पनि कालोपत्र गर्दै लगिनेछ,’ उनले भने ।
मुग्लिन–पोखरा सडक आयोजनाको पूर्वी खण्डको तुलनामा पश्चिम खण्डको केही काम सुस्त छ । अहिले पोखरा खण्डको राजमार्ग क्षेत्रमा अधिकांश स्थानमा स्तरोन्नतिका लागि सडक फराकिलो बनाउने काम भइरहेको छ ।
राजमार्गको सहरी क्षेत्रमा सर्भिस लेनसहित ६ लेन र अन्य स्थानमा ४ लेनको सडक बनाउने काम भइरहेको छ । पोखराको सेती पुलदेखि तल्लो गगनगौँडासम्म ६ लेनको सडक निर्माण हुनेछ । भौतिक पूर्वाधार मन्त्रालय, सडक विभाग तथा स्थानीय सरकारले ताकेता गरेपछि अहिले ठेकेदारले निर्माणको कामलाई गति दिएको आयोजनाले जनाएको छ ।
यो सडक खण्डमा लामो समय विद्युतीय पोल र खानेपानीका पाइप हटाउन ढिलाइ हुँदा काम प्रभावित भएको थियो । एशियाली विकास बैंक (एडिबी) को सहुलियतपूर्ण ऋण सहयोगमा पोखरादेखि मुग्लिनसम्मको २ लेनको सडकलाई विस्तार गरी फराकिलो र स्तरीय बनाउनका लागि मुग्लिन–पोखरा सडक आयोजना निर्माण भइरहेको हो । सडक विस्तारको कार्य छिटो सम्पन्न गर्ने उद्देश्यले दुई भागमा विभाजन गरी काम सुरु गरिएको छ ।
पोखराको पृथ्वीचोकस्थित सेती पुलदेखि तनहुँको जामुनेसम्मको ३९ किमी क्षेत्र पश्चिम खण्डमा पर्दछ । सो खण्ड हेर्ने गरी पोखरामा मुग्लिन–पोखरा सडक योजनाकोे कार्यालय नै राखिएकाे छ ।
जामुनेदेखि आँबुखैरेनीसम्मको ४३ किमी सडक पूर्वी खण्डमा पर्दछ । पश्चिम खण्ड ७ अर्ब ४० करोड ४६ लाख रुपैयाँ लागतमा निर्माण सम्पन्न गर्ने गरी २०७८ साल जेठमा ठेक्का सम्झौता भएको थियो । सम्झौता अनुसार यो सडक आयोजना २०८१ साल भदौभित्र सम्पन्न गर्नुपर्नेछ ।
